وفاقی داخلہ ءِ وزیر محسن نقوی ءَ عمان ءِ شاہی وزیر جنرل سلطان بن محمد النعمانی  ءَ گوں مشکت ءَ گند ءُ نند کتگ ءُ پاکستانی شہری آنی ویزہ ءِ جیڈھ آنی گیواری ءُ وت مہ وتی کمک ءِ دیمروئی ءِ ھوالگ ءَ جیڈھ آنی سر ءَ گپ ءُ تران

مشکت۔ 30اکتوبر (اے پی پی): وفاقی وزیر داخلہ محسن نقوی ءَ عمان ءِ شاہی وزیر جنرل سلطان بن محمد النعمانی  ءِ گوما مشکت ءَ ھاسیں گند ءُ نند کتگ، ایشی ءِ تہ ءَ پاک عمان ءِ سیادی، پاکستانی شہری آنی ویزہ ءِ جیڈھ آنی گیواری ءُ وت مہ وتی کمک ءِ دیمروئی ءِ جیڈھ آنی سر ءَ سرجمیں رنگ ءَ گپ ءُ تران کنگ بوتگ۔ وزارت داخلہ ءِ جارکش ءِ رد ءَ گند ءُ نند ءَ دوئیں بامرد آں خطہ ءِ سرجمیں جاور ھال آنی سر ءَ ھم گپ ءُ تران کتگ ءُ وت مہ وتی یکوئی آناں گیش مھکم کنگ ءِ جزم ءِ درشان کتگ۔ وفاقی تہی کارانی وزیر محسن نقوی ءَ گوشت کہ عمان ءُ پاکستان یکجائی ءِ مذہبی ءُ دود ءُ ربیدگی سیادی ءَ گوں بندوک اَنت۔ عمان ءَ لاکھوں پاکستانی کار ءَ اَنت کہ اے دوئیں ملک آنی معیشت ءِ مھکم کنگ ءَ ھاسیں کرد پیلو کن اَنت۔ آئی ءَ گوشت کہ ویزہ پالیشی ءِ آسانی ءَ چہ گیش ہنرمندیں پاکستانی کارندہ عمان ءَ روگ ءِ موہ ءَ دار اَنت ایشی ءَ چہ دوئیں براتیں ملک آنی واستہ سیت پائدگ ثابت بیت۔ محسن نقوی ءَ گوشت کہ پاکستان عمان ءِ گوما ھمک پڑ ءَ شریداری ءُ کمک ءَ را گیش کنگ لوٹ ایت۔ عمان ءِ شاہی وزیر جنرل سلطان بن محمد النعمانی ءَ اے موہ ءِ سر ءَ گوشت کہ پاکستان ءُ عمان ءِ نیام ءَ براتی ءُ راجدپتری سیادی است انت، ایشی ءَ را گیش مھکم کنگ ءِ واستہ دوئیں ملک آنی نزیکیں رابطہ برجاہ دارگی انت۔