بنجائی وزیر کانود و انصاف سینیٹر اعظم نذیر تارڑ تون کینیڈا نا ہائی کمشنر طارق علی خان نا اوڑدہی

اسلام آباد۔ 29اکتوبر (اے پی پی) بنجائی وزیر کانود و انصاف سینیٹر اعظم نذیر تارڑ تون کینیڈا نا ہائی کمشنر طارق علی خان چارشنبے نادے آ اسلام آباد اٹی اوڑدہی کرے۔ وزارت کانود و انصاف نا ترجمان نا رداٹ اوڑدہی ٹی ہڑتوم آ کنڈآتا تعلقداری نا مون آ دننگ، کانودی اصلاحات، انسانی حق انا رکھ و زرکاری نا وارخواہی تیا سرجمی اٹ گپ وتران کننگا۔ بنجائی وزیر کانود پوسکن تعینات مروک آ ہائی کمشنر ءِ جم وجوش اٹ بخیرکرساپارے کہ پاکستان وکینیڈا نا نیام اٹ متکن آ تعلقداری پت و تین پہ تینی شرف آ تالان ءِ، ہرافتے پین سوگو کننگ نا گرج ءِ۔ کینیڈین ہائی کمشنر داوخت آپارے کہ کینیڈین کمپنی پاکستان اٹ چندی بشخ، خاص کرمعدنیات نا بشخ اٹی زرکاری ٹی است خواہی تخک۔ اوپارے کہ کینیڈا آخبت اٹ پاکستان تون شریداری نا پوسکن آ وارخواہی پٹنگ نا خواہندار ءِ۔ بنجائی وزیرکانود پارے کہ حکومت پاکستان درملکی زرکارآتے سازگار چاگڑد فراوان کننگ کن سنبرینگوک ءِ۔ اوہائی کمشنر ءِ وزارت کانود نا رداٹ بناکروک آکیس مینجمنٹ سسٹم نا بارواٹی معلومدار کرے و پارے کہ دانظام ءِ صوبائی کہول آہم درستی راستی کرفنگ انگ ءِ تانکہ عدالتی کارکڑد اٹی گچینی اتنگ مرے ۔ اوڑدہی ٹی آخبت کینیڈا ٹی اڈ ہلوک مائننگ کانفرنس اٹ پاکستان نا بشخ ہلنگ و تین پہ تینی کمکاری نا مون آ دننگ آہم گپ وتران مس۔