طالبان حکومت بیرہ تینا کوزہ گیر حکمرانی و جنگی زرگزران ءِ بچفنگ کن اوغانستان ءِ اسہ پین جھیڑہ سے ٹی بِٹنگ ءِ ، وزیر دفاع خواجہ محمد آصف

اسلام آباد۔ 29 اکتوبر (اے پی پی) وزیردفاع خواجہ محمد آصف افسوز ظاہر کرسا پارینے کہ طالبان رجیم بیرہ تینا کوزہ گر حکمرانی و جنگی زرگزرانءِ بچفنگ کن اوغانستان ءِ اسہ پین جھیڑہ سے ٹی بِٹنگ ءِ، پاکستان تینا گل زمین آ اسہ ہم دہشت گردانہ یا خودکش جلہو اسے سگپک و ہر مہم جوئی نا ورندی سخت و خرین مریک۔ چارشنبے نادے آ استنبول مذاکرات نا بے نتیجہ مننگ آ تینا بیان اٹی اوپارے کہ اوغان طالبان رجیم پدریسہ ایلم ملک آتیان مذاکرات کن درخواست کریکہ، ایلم ملک آتا خواست آ پاکستان اوغان طالبان رجی تون امن نا خاطر مذاکرات نا پیشکش ءِ امنا کرے۔ وزیردفاع پارے کہ گڑاس اوغان کمامدار آتا زیارآن پُر بیانک دا ظاہر کیرہ کہ طالبان رجیم اٹی انتشار و درو پدریسہ ساڑی ءِ، پاکستان دا پیدوار کیک کہ طالبان رجیم ءِ چٹفنگ یا اوفتے غارتیٹی ڈکنگ آ بیوس کننگ کن پاکستان تینا پورو واک ءِ کاریم اٹ اتنگ نا اسُل گرج اف، اگہ ضرورت تما تو نن اوفتے تورابورا کون آ ہند آتیا شکست ترسا مخلوق کن درور اس جوڑ کننگ کینہ ہرا اقوام عالم کن دلچسپ ءُ منظراس مریک۔ اوپارے کہ افسوز مریک کہ طالبان رجیم بیرہ تینا کوزہ حکمرانی و جنگی زرگزران ءِ بچفنگ کن اوغانستان ءِ اسہ پین جھیڑہ سے ٹی بِٹنگ ءِ ، تینا نزوری و جنگی دعویٰ تا حقیقت ءِ چاہسا طبل جنگ خلسا بظاہر اوغان الس اٹی تینا بگڑینگوک آ ساکھ ءِ بچفنگ نا بے سہب کوشست کننگ ءِ۔ اگہ اوغان طالبان ولدا ہم دُوارہ اوغانستان و اونا کودک الس ءِ بھس کننگ آ بضد ءِ تو ولدا انتس کہ مروئی مس مرے۔ اوپارے کہ ہراتسکان’’ گریویارڈ آف ایمپائر‘‘ نا بیانیہ نا تعلق ءِ، پاکستان تینے اسُل ’’ایمپائر‘‘ پاپک، حقیقت دادے کہ اوغانستان طالبان تا سوب آن تینا ہی مخلوق کن اسہ قبرستان اسے آن کم اف، تاریخی اعتبار اٹ اوغانستان سلطنت آتا قبرستان تو سلتنے البتہ بھلا واکدار آتا گوازی نا پڑ ضرور مسنے۔ وزیردفاع پارےکہ طالبان نا ہمو جنگجو ہرا ڈیہہ اٹی بدامنی تالان کننگ اٹ تینا جندی فائدہ غاتے ہُننگ ءُ سمجھر کہ اوشاید پاکستانی عزم و حوصلہ ءِ غلط وڑاٹ ہلکنو، اگہ طالبان رجیم جنگ کننگ نا کوشست کیک تو دنیا خنک کہ اوفتا دھڑکوک بیرہ دکھاوا ئسر۔ اوپارے کہ پاکستان تینا گل زمین آ اسہ ہم دہشت گردانہ یا خودکش جلہو اسے سگپک و ہر مہم جوئی نا ورندی ءِ سخت و خرین مریک، طالبان رجیم ءِ مرے کہ تینا انجام نا حساب ءِ ضرور تخر، انتئے کہ پاکستان نا عزم و لائخی تے آزمائفنگ اوفتے کن بھاز کبین ثابت مریک۔