بنجائی وزیر واپار جام کمال خان تون امریکی ٹیکنالوجی کمپنی میٹا نا ڈل انا اوڑدہی، ڈیجیٹل واپار، ای کامرس و مصنوعی ذہانت نا بشخ آتیٹی کمکاری نا بارواٹی گپ وتران

اسلام آباد۔ 29 اکتوبر (اے پی پی) بنجائی وزیر واپار جام کمال خان تون امریکی ٹیکنالوجی کمپنی میٹانا اسہ ڈل اس ڈائریکٹر پبلک پالیسی (سویلی ایشیا) رافیل فرانکل نا کماشی ٹی چارشنبے نادے آ وزارت واپار اٹی اوڑدہی کرے ہراٹی ڈیجیٹل واپار، ای کامرس و مصنوعی ذہانت(اے آئی) ٹی کمکاری نا بابت گپ وتران کننگا، داوخت آ وزیراعظم نا خصوصی کمکار واپار رانا احسان افضل ہم ساڑی ئس۔ ڈل انا خیرمقدم ءِ کرسا جام کمال خان پاکستان نا ڈیجیٹل بدلی نا مخ تفی ٹی میٹا نا شریداری نا ستاءِ کرے ۔ اوپارے کہ پاکستان نا ڈیجیٹل اکانومی سویلی ایشیاٹی غٹ آن ترندی شون ہلوک زرگزران تیان اسٹ ءِ ہرا ورناتا آبادی، ودوک آ کنیکٹیویٹی و اسہ سوگو آئی ٹی ٹیلنٹ بیس انا کمک اٹ سالانہ 75,000آن زیات گریجویٹس تیار کیک۔ بنجائی وزیر ڈل ءِ ای کامرس ءِ سوگو کننگ، آئی ٹی برآمد آتے مون آ دننگ و اے آئی ءِ قومی زرگزران اٹی ضم کننگ کن وزارت نا گام گیج آتیان معلومدار کرے۔ اوپارے کہ پاکستان نا آئی ٹی و آئی ٹی ای ایس نا برآمدات مالی سال 2025اٹی 18 درسد ودکی اتون 3.8 ارب ڈالر اسکان ئسر وخت اس کہ مالی سال 2026نا اولیکو سہ ماہی ٹی برآمدات 1.06 ارب ڈالر اسکان سرمسر ہراکہ سالانہ بنداو آ 21 درسد ودکی ءِ۔ اوپارے کہ قومی ای کامرس پالیسی 2.0(2030-2025)نا رداٹ 2030 اسکان پاکستان نا ای کامرس مارکیٹ ءِ 20 ارب ڈالر اسکان ودفنگ کن گڈیکو دروشم اس تننگ انگ ءِ، ہراٹی ایم ایس ایم ای ڈیجیٹائزیشن ، لاجسٹکس اٹی گچینی و سرحد پار واپار نا آسراتی آ چکار کننگک۔