وزیرداخلہ نا ایران نا سپریم نیشنل سیکورٹی کونسل نا سیکرٹری و تینا ایرانی ہم منصب تون جتا جتا اوڑدہی

تہران۔ 29 اکتوبر (اے پی پی) بنجائی وزیر داخلہ محسن نقوی ایران نا سپریم نیشنل سیکورٹی کونسل نا سیکرٹری علی اردشیر لاریجانی و ایرانی ہم منصب سکندر مومنی تون جتا جتا اوڑدہی کرے۔ سپریم نیشنل سیکورٹی کونسل نا دفترآ بننگ آ سیکرٹری علی اردشیر لاریجانی وزیرداخلہ محسن نقوی ءِ جم وجوش اٹ بخیر کرے ۔ اوڑدہی ٹی پاک ایران تعلقداری، سیکورٹی کمکاری، دہشت گردی تور، منشیات تور و بارڈر مینجمنٹ نا بابت سرجمی اٹ گپ وتران کننگا۔ فریق آک ہڑتوم آکنڈآتا کمکاری ءِ پین سوگو کننگ و اسیجائی رابطہ غاتیٹی ودکی نا گرج آ امنا کریر۔ داوخت آ وزیرداخلہ محسن نقوی پارے کہ پاکستان ایران تون سیکورٹی و منشیات تور نا بشخ آتیٹی کمکاری ءِ مون آ دننگ خواہک۔ ایرانی سپریم نیشنل سیکورٹی کونسل نا سیکرٹری علی اردشیر لاریجانی پارے کہ ہڑتوم آکنڈآتا تعلقداری ٹی مثبت پیش رفت ستاکڑزک۔ اوکان پد وزیرداخلہ محسن نقوی ایرانی ہم منصب سکندر مومنی تون ہم اوڑدہی کرے ہراٹی داخلی سلامتی نا امور و انسداد منشیات نا بابت تین پہ تینی کمکاری آ گپ وتران مس۔ محسن نقوی ای سی او ، وزارتی کانفرنس نا سرسہب اڈتننگ آ ایرانی وزیرداخلہ ءِ مبارکبادی تس و پارے کہ دا کانفرنس باسک ملک آتیکن دوررس نتیجہ غاتا حامل مریک۔اومستی پارے کہ پاکستان داخلی سلامتی نا باندات آتیٹی ایران نا آزموندہ غاتیان فائدہ ہرفنگ خواہک۔ وزیرداخلہ محسن نقوی ایرانی ہم منصب ءِ پاکستان نا دورہ نا سلہ خلک، ہراڑآ سکندر مومنی پارے کہ زوت تینا ایلم تون ملنگ کن اسلام آباد آ بریوہ۔ ایرانی وزیرداخلہ ای سی او وزارتی کانفرنس اٹی بشخ ہلنگ آ پاکستانی ہم منصب نا منت واری ءِ ہرفے۔ داوخت آ بنجائی وسیکرٹری داخلہ خرم آغا، ایران اٹ پاکستان نا سفیر محمدمدثر ٹیپو ، ایرانی وزارت داخلہ نا بڑزکو کمامدار و سفارتی آفیسر آک ہم ساڑی ئسر۔