وزیراعظم محمد شہباز شریف سعودی عرب نا دورہ ءِ پورو کننگ آن پد وطن آ پدی روانہ مس

ریاض ۔ 29 اکتوبر (اے پی پی) وزیراعظم محمد شہباز شریف سعودی عرب نا دورہ ءِ پورو کننگ آن پد وطن آ پدی روانہ مس۔چارشنبے نادے آ ریاض انانائب گورنر شہزادہ محمد بن عبدالرحمان بن عبدالعزیز وزیراعظم و پاکستانی ڈل ءِ کنگ خالد انٹرنیشنل بالی پٹ آ رخصت کرے۔ پی ایم آفس نا میڈیا ونگ آن جاری بیان نا رداٹ وزیراعظم نا دورہ ٹی سعودی عرب نا ولی عہد و وزیراعظم شہزادہ محمد بن سلمان بن عبدالعزیز آل سعود تون اوڑدہی مس ہراٹی پاکستان وسعودی عرب نا نیام اٹ اقتصادی کمکاری نا فریم ورک نا بناءِ کننگا، دا فریم ورک پاکستان  وسعودی عرب نا نیام اٹ اقتصادی تعلقداری ٹی اسہ پوسکن ءُ بشخ اسے نا بناءِ، فریم ورک پاکستان و سعودی عرب نا نیام اٹ ساڑی آ متکن آ تعلقداری تا پین سوگوی نا بابت اقتصادی کمکاری ، ہڑتوم آ ملک آتا نیام اٹ کمکاری نا پوسکن ءُ کسر پٹنگ اٹ اہم کڑد ادا کیک۔ دا فریم ورک نا رداٹ ہڑتوم آملک آتا نیام اٹ توانائی، صنعت، کانڑ کنی، انفارمیشن ٹیکنالوجی، سیل و سوات ، کشت وکشار  وغذائی رکھ انا بشخ آتیٹی کمکاری ، نجی بشخ انا کڑد ءِ ودفنگ و واپاری ہن و برنا مون آدننگ کن کاریم مریک۔ فریم ورک انا رداٹ ہڑتوم آملک آتا نیام اٹ برجا چندی اسیجائی ڈٹ بشمول پاکستان وسعودی عرب نا نیام اٹ بجلی نا فراوانی نا ڈٹ و توانائی نا بشخ اٹی کمکاری نا مفاہمتی یات داشت آتیا دستخط ہم اوار ئس۔ وزیراعظم محمد شہباز شریف ریاض اٹی اڈ ہلوک فیوچر انویسٹمنٹ انیشی ایٹیو نا 9 می کانفرنس اٹی بشخ ہلک و ’’انت انسانیت سہی سمت انا کنڈآ ہِننگ ءِ؟‘‘ نا سرحال آ گول میز شرہ ٹی پاکستان نا نقطہ نظر ءِ پیش کرے۔ اوتینا گپ وتران اٹی انسانی شونداری و راجی آسودہی کن جہانی شریداری نا گرج آ زور شاغا۔ وزیراعظم محمد شہباز شریف سعودی ولی عہد و وزیراعظم شہزادہ محمد بن سلمان نا شونداری نا وژن و دنیا ٹی شونداری نا گام گیج آتا بابت سعودی عرب نا کڑد انا ستاءِ کرے۔ اوپاکستان اٹی موسمیاتی بدلی نا مضر اثرات و نوکاپ نا بھسکاری تے مون آ تخسا گلوبل نارتھ نا گلوبل ساؤتھ تون شریداری آ زور شاغا۔ اوخاص کر ورناپاکستانی افرادی قوت نا شونداری، مصنوعی ذہانت نا مون آدننگ وانفارمیشن ٹیکنالوجی نا بشخ اٹی شونداری کن حکومتی گام گیج آتے تالان کرے۔ وزیراعظم نا دورہ ٹی جہانی اقتصادی فورم نا صدر و چیف ایگزیکٹیو بورگابغینڈے تون ہم اوڑدہی مس۔