پولیو نا چٹفنگ حکومت نا اولیت، دا بارواٹی یکسوئی اٹ گام گیج کننگ اُن، وزیرجان جوڑی سید مصطفیٰ کمال

اسلام آباد۔ 29 اکتوبر (اے پی پی) بنجائی وزیر قومی جان جوڑی سید مصطفیٰ کمال پارینے کہ پولیو نا چٹفنگ حکومت نا اولیت آتیٹی اوار ءِ، وزیراعظم محمد شہباز شریف نا کماشی ٹی پورو یکسوئی اتون پولیو تور نا گام گیج کننگ اُن۔ داخیال آتا درشانی ءِ او ریاض اٹی سعودی وزیرجان جوڑی فہد بن عبدالرحمان الجلاجے تون اوڑدہی ٹی کرے۔ وزارت جان جوڑی نا کنڈآن جاری بیان نا رداٹ اوڑدہی ٹی جان جوڑی نا بشخ و تین پہ تینی کمکاری نا بابت گپ وتران کننگا۔ ہڑتوم آ وزیرآک پاکستان و اوغانستان اٹی پولیو تور نا بارواٹی گپ وتران تون اوار اوار بروک آ پولیو تور مہم نا بابت ہم گپ وتران کریر۔ بنجائی وزیر پارے کہ ہڑتوم آملک آتا نیام اٹ تاریخی و ایلمی تعلقداری سوگو بنداو تیا ٹی ءِ۔ اوپارے کہ سال 2025اٹی داتم اسکان 4 قومی پولیو تور مہم آتے سرسہبی اٹ اڈتننگانے، اوفتے ٹی 45 ملین چناتسکان پولیو ویکسین نا رسنگ ءِ پک کننگا، بڑزکو آب انا پولیو تور مہم آتے ٹی پولیو نا کیس آتیٹی نمان کمتی بس، دا جہد اٹی پیش رفت آن پد ہم مشن داسکان پورو متنے۔ سعودی ڈل پاکستان نا کنڈآن پولیو تور نا بابت چست کروک آ گام گیج آتا ستاءِ کرے و آخبت اٹ دا بابت کمکاری ءِ برجاتخنگ نا باوری ہم کرفے۔