پاکستان نیوی سٹاف کورس انا 55 می ڈل انا پارلیمنٹ ہاؤس نا مطالعاتی دورہ

اسلام آباد۔ 29 اکتوبر (اے پی پی) پاکستان نیوی اسٹاف کورس انا 55 می بیج انا 114 باسکی ڈل اینو تینا ملک انا تہہ ٹی مطالعاتی دورہ ٹی پارلیمنٹ ہاؤس نا دورہ ءِ کرے، سینیٹ سیکرٹریٹ نا سینئر آفیسر آک ڈل ءِ جم و جوش اٹ بخیرکریر۔ چارشنبے نادے آ سینیٹ سیکرٹریٹ آن جاری بیان نا رداٹ سینیٹ سیکرٹری سید حسنین حیدر ڈل ءِ سینیٹ آف پاکستان نا کڑد، پنجر، واکداری و وڑوڈول نا بارواٹی سرجمی اٹ حوال تس۔ اوپارے کہ سینیٹ ، پاکستان نا اِرا ایوانی مقننہ نا بڑزکو ایوان ءِ ہرا بنجائی اکائی تا بریبر نمائندگی نا ضامن ءِ۔ سینیٹ نا بنداوی مسخت قومی ہم گرنچی ءِ مون آ دننگ و چنکا صوبہ غاتا حق و فائدہ غاتا رکھ ءِ پک کننگ ءِ۔ سیکرٹری سینیٹ مستی پارے کہ سینیٹ کانود سازی، چاروکی، احتساب و السی نمائندگی نا اہم فرض سرایتک۔ اوپارے کہ سینیٹ ملکی پالیسی جوڑ کننگ و جمہوری عمل ءِ سوگو کننگ اٹ اہم کڑد ادا کیک۔ حوال اٹی ڈل بھاز است خواہی نا درشانی ءِ کرے و سوج و ورندی نا سیشن اٹی پبی بشخ ہلک، ہراٹی سیکرٹری سینیٹ اوفتا غٹ سوج آتا سرجمی اٹ و جوان ورندی ءِ تس۔ دورہ نا ایسر آ نیوی اسٹاف کورس انا باسک آک سینیٹ سیکرٹریٹ نا جمہوری طرز حکمرانی نا مون آدننگ ، ادارہ جاتی شفافیت نا قیام و پارلیمانی نظام ءِ گچین کننگ اٹ ادا کروک آ کڑد انا ستاءِ کریر۔