ایشیائی شونداری بینک انا گرین کلائمیٹ فنڈ انا کنڈآن ’’گلیشیئرز ٹو فارمز‘‘ پروگرام کن 25 کروڑ ڈالر نا منظوری

اسلام آباد۔ 29 اکتوبر (اے پی پی) ایشیائی شونداری بینک (اے ڈی بی ) نا گرین کلائمیٹ فنڈ ’’گلیشیئرز ٹوفارمز‘‘ پروگرام کن 25 کروڑ ڈالر نا منظوری ءِ تس۔ چارشنبے نادے آ جاری اعلامیہ نا رداٹ دا پروگرام ایشیائی شونداری بینک انا رداٹ پاکستان تون اوار 9 ملک آتیٹی بناکیک، دا ڈٹ انا مسخت گلیشیئرآ سیبو کروک آ ڈیہہ تیٹی دِیر و کشت وکشار نا نظام ءِ سوگو کننگ ءِ۔ ڈٹ انا بابت اعلامیہ ٹی مستی پاننگانے کہ اے ڈی بی بروک آ10 سال اٹی ڈٹ آتیا 3.25ارب ڈالر نا زرکاری کیک و ڈٹ انا رداٹ گچین آبپاشی، دِیرکوڑی و واٹر شیڈ مینجمنٹ ءِ مون آدننگک۔ گلیشیئرز نا دِیر مننگ آن خشک سالی و نوکاپ کون آ خطرہ غاتیٹی ودکی مننگ ءِ و اے ڈی بی نا دا پروگرام آن 1.3 کروڑ بندغ، خاص کر بزغر و مشی آ علاقہ غاتا آبادی فائدہ ہرفک۔ اعلامیہ نا رداٹ گلیشیئرز آن پیش تموک آ 4 بھلا دریائی حوض، نارین، پیانج ، کورا و سوات، دا پروگرام نا بشخ مریرہ، دا ڈٹ موسمیاتی و گلییشئرز پٹ وپول ءِ قومی شونداری ڈٹ بندی ٹی اوار کیک ، دانا رداٹ خطرناک حالیت آتون مون تننگ کن جدید وارننگ و مانیٹرنگ نظام اس ہم جوڑ کننگک۔ داپروگرام نا رداٹ دِیر انا کاختی و بھاز باسنی آن زہمی کمیونٹی تیکن راجی رکھ سوگو کننگک، ہندی بینک آتے زالبول آتا کماشی ٹی کشاری کاروبارنا کمکاری نا قابل جوڑ کننگک۔ اعلامیہ ٹی پاننگانے کہ گلیشیئرز نا دِیر مننگ ڈیہہ اکن پیچیدہ شونداری چیلنج اسے ، جی سی ایف نا کمک اٹ ڈیہہ منتشر ڈٹ آتیان پیش تمسا منظم لچکدار نظام نا کنڈآ کاہک۔ اے ڈی بی نا رداٹ گرین کلائمیٹ فنڈ (جی سی ایف) دنیا نا غٹ آن بھلا چاگڑدی فنڈ ءِ، ہرانا رداٹ 43 می بورڈ دیوان اٹی ساڑی آپروگرام نا منظوری ءِ تننگانے، 2024ء ٹی جی سی ایف نا کمک اٹ مروک  جاست وپاست داپروگرام نا سائنسی بنداو فراوان کرے۔