پاکستان و ترکیہ نا تعلقداری تزویراتی شریداری نا اسہ پوسکن ءُ دور اسے ٹی پترینگانے، وزیراعظم شہباز شریف

اسلام آباد۔ 29 اکتوبر (اے پی پی) وزیراعظم محمد شہباز شریف ترک صدر رجب طیب اردوان و ترکیہ نا ایلم الس ءِ ترکیہ نا یوم جمہوریہ غا مبارکبادی ترساپارینے کہ پاکستان وترکیہ نا تعلقداری تزویراتی شریداری نا اسہ پوسکن ءُ دور اسے ٹی پترینگانے۔ ترکیہ نا 102 می یوم جمہوریہ نا وخت آ تینا کلہو اٹی وزیراعظم پارے کہ او دا خوشی نا وخت آ تینا ہنین آ ایلم صدر رجب طیب اردوان و ترکیہ نا ایلم الس ءِ تینا و پاکستانی الس نا کنڈآن مبارکبادی پیش کیک۔ وزیراعظم آفس نا میڈیا ونگ انا کنڈآن چارشنبے نادے آ جاری بیان نا رداٹ وزیراعظم پارے کہ تدوک آ دہائی ٹی صدر اردوان نا جیرت مندانہ و متحرک کماشی ٹی ترکیہ نا شاندار بدلی و زرگزرانی بحالی ءِ جہانی پذیرائی دوئی مسنے۔ وزیراعظم پارے کہ ننے تینا ترک ایلم تا سرسہبی و کارنامہ غاتیا گمرءِ  و شونداری نا داسفر اٹی نن اوفتا ثابت گام سنگت اُن۔ وزیراعظم پارے کہ پاکستان و ترکیہ نا تعلقداری،جغرافیہ و وخت آن ایڑتر، اسیجائی عقیدہ، تاریخ و ایلمی نا بنداو آ ٹی ءِ ۔ اوپارے کہ ننا تعلقداری صدر اردوان نا مدبرانہ راہشونی ٹی تزویراتی شریداری نا اسہ پوسکن ءُ دور اسے ٹی پترینگانے، انتئے کہ نن اسیجائی فائدہ نا غٹ بشخ آتیٹی وخت انا ہر آزمائشت آن گدرینگسا پائیدار تعلقداری ءِ مون آ دننگ کن اواری اٹ کوشست کننگ اُن۔