بنجائی وزیر داخلہ محسن نقوی نا ترکیہ نا قومی دے انا وخت آ ترک قوم و صدر رجب طیب اردوان ءِ مبارکباد

اسلام آباد۔ 29 اکتوبر (اے پی پی) بنجائی وزیر داخلہ محسن نقوی ترکیہ نا قومی دے انا وخت آ ترک قوم و صدر رجب طیب اردوان ءِ مبارکبادی ترساپارینے کہ دا دے ترکیہ نا آجوئی، خودداری، استقامت و قربانی تا یات ترفک۔ مصطفیٰ کمال اتاترک نا وژن آن بناکروک آ سفر اینو صدر رجب طیب اردوان نا کماشی ٹی پوسکن آ بڑزی تیا سرمننگ ءِ۔ تینا کلہو اٹی محسن نقوی پارے کہ صدر رجب طیب اردوان نا مدبرانہ کماشی ترکیہ ءِ شونداری و شونہالی نا مزل آن ہمکنار کرینے ۔ پاکستان و ترکیہ نا الس نا است جغرافیائی حد انا پابند افس۔ اوپارے کہ ہرمشکل ساہت اٹی ترکیہ پاکستان تون تفینے، چائے زمی جمب مرے، نوکاپ مرے یا جنگ، ترکیہ مدام ننتون ہم کوپہ سلیسنے۔ بنجائی وزیر داخلہ پارے کہ کشمیر نا ویل آ ترکیہ نا اصولی و دوٹوک موقف اینو ہم پاکستانی الس نا است آتیٹی زندہ ءِ۔ محسن نقوی پارے کہ پاکستان و ترکیہ داسہ اقتصادی دفاعی و دودوربیدہ ئی کمکاری نا پوسکن آ دور اٹی پترینگانے۔ پاکستان نا الس ترکیہ نا شونداری و صدر اردوان نا کماشی آ گمر محسوس کیک۔ اوپارے کہ قومی دے انا وخت آ پاک ترک سنگتی نا عزم ءِ اسہ پوسکن ءُ جوش و جوزہ اسے تون دوہرائفینہ۔ اِرا است ، اسہ جوزہ، اسہ مزل : امن ، شونداری و ایلمی ءِ۔