پاکستان نا الس نا سلامتی قومی اولیت ءِ، دہشت گرد آتون اوار اوفتا ٹھکانہ و کمکارآتے نیست و نابود کننگ کن غٹ وسیلہ غاتے کاریم اٹ اتنگک، عطاء اللہ تارڑ

اسلام آباد۔ 29 اکتوبر (اے پی پی) بنجائی وزیر حوالکاری و شینکاری عطاءا للہ تارڑ پارینے کہ اوغان طالبانک اوغانستان نا الس ءِ بے گرج جنگ اٹی بِٹنگ خوارہ، پاکستان مدام اوغانستان نا الس نا امن و شونہالی کن قربانی تس، اوغان طالبان آتون کیہی وار مذاکرات کرین ولے اوغان فریق پاکستان نا نسخان تیان لاتعلق ئس، چار سال انا بھلو وخت اسے آن  جونی ومالی نسخان سگنگ آن پد داسہ پاکستان نا صبر انا پیمانہ لبریز مسنے، پاکستان قطر، ترکیہ و ایلو سنگت ملک آتا مخلصانہ کوشست آتیا منت وار ءِ، پاکستان نا الس نا سلامتی قومی اولیت ءِ، حکومت پاکستان دہشت گردی نا برخلاف ہرممکن گام گیج کیک، دہشت گرد، اوفتا ٹھکانہ و کمکار آتے نیست ونابود کننگ کن غٹ وسیلہ غاتے کاریم اٹ اتنگک۔ چارشنبے نادے آ راجی رابطہ نا پلیٹ فارم ’’ایکس‘‘ آ تینا اسہ پوسٹ اسے ٹی اکتوبر 2025 ء ٹی استنبول اٹی پاکستان و اوغانستان نا مذاکرات نا بارواٹی معلومدار کرسا بنجائی وزیرحوالکاری پارے کہ کابل اٹی اقتدار ءِ سنبھالنگ آن پد آن پاکستان وار وار آ اوغان طالبان حکومت تون بھارتی مخ تف فتنۃ الخوارج (ٹی ٹی پی) و بھارتی پراکسی فتنۃ الہندوستان (بی ایل اے) نا کنڈآن پدریسہ سرحد پار دہشت گردی نا ویل آتیا گپ وتران کرے۔ اوغان طالبان حکومت ءِ وار وار آ یات دہانی کرفنگا کہ او دوحہ معاہدہ نا رداٹ پاکستان وجہانی برادری تون کروک آ تینا نوشتہی قول آتیا عملدرآمد ءِ پک کیر۔ ولے پاکستان نا مخلصانہ و پدریسہ کوشست آک داخاطرآن بارآور متوس کہ اوغان طالبان حکومت پدریسہ پاکستان مخالف دہشت گرد زموار آتا کاٹم خواجہی ءِ کرساکرینے۔ دُن تو طالبان حکومت اوغان الس نا تئیں ہچ ءُ زمواری اسے نا درشانی ءِ کپک و جنگی زرگزران آ سیبو کیک، ہنداسوب آن او اوغان الس ءِ اسہ بے گرج ءُ جنگ اسے ٹی بِٹنگ خواہک۔ بنجائی وزیر حوالکاری پارے کہ پاکستان مدام اوغانستان نا الس نا امن وشونہالی نا خواہندار مسنے، اوڑکن توار بڑز کرینے و بے پناہ قربانی تسنے۔ ہندا جوزہ نا رداٹ پاکستان اوغان طالبان حکومت تون مذاکرات و گپ وتران نا بے شمار دور آتے اڈ تس ولے افسوز کہ او مدام پاکستان نا نسخان تیان لاتعلق مس۔ اوپارے کہ بدبختی اٹ چار سال انا بھلو وخت اسے ٹی جونی ومالی نسخان سگنگ آن پد داسہ پاکستان نا صبر انا پیمانہ لبریز مسنے۔ اوپارے کہ امن ءِ اسہ پین موقع اس تننگ نا گرج آن، ایلم ملک قطر و ترکیہ نا خواست آ پاکستان اوغان طالبان حکومت تون مذاکرات کرے۔ دا مذاکرات اول دوحہ، قطر اٹی و اوکان پد استنبول ، ترکیہ ٹی اڈ ہلک۔ دا مذاکرات نا اسٹ انگا ایجنڈا دا ئس کہ اوغان طالبان حکومت ہندن ءُ عملی گام گیج کے ہرافتیان اوغان گل زمین ءِ دہشت گرد تنظیم تا ہیلکاری و لاجسٹک سرجزو پاکستان نا برخلاف دہشت گرد جلہو آتا اڈہ نا وڑاٹ کاریم اٹ اتنگ آن توننگ مرے۔ اوپارے کہ پاکستان قطر و ترکیہ نا منت وار ءِ ہرافک دا گپ وتران نا اڈتننگ اٹ کمک فراوان کریر و اوغان طالبان حکومت ءِ دا ہیت آ قائل کننگ کن مخلصانہ کوشست کریر کہ او پاکستان نا برخلاف دہشت گرد گروپ آتے بطور آلہ کاریم اٹ اتنگ آن پاناد کے۔ تدوک آ چار دے ئی مذاکرات اٹی اوغان طالبان ڈل وار وار آ پاکستان نا ہمو منطقی و روا خواست آن امنا کرے کہ ہمو تنظیم و دہشت گرد آتا برخلاف پت انا قابل و فیصلہ کن کارروائی کننگے۔ پاکستان نا کنڈآن پیش کوک وافر و ناقابل تردید شاہدی تے اوغان طالبان و مہماندار ملک آک امنا ہم کریر، ولے افسوزناک ہیت دادے کہ اوغان فریق نا کنڈآن ہچ ءُ باوری اس کرفنگتو۔ اوغان ڈل پدریسہ بنداوی ویل آتیان انحراف کرساکرے و دا مرکزی ٹک آن گریزاں ئس ہرانا بنداو آ مذاکرات نا بناءِ کننگاسس۔ تینا زمواری تے امنا کننگ نا جاگہ غا اوغان طالبان دوبہ خلنگ، ٹال مٹول و حیلہ بہانہ اختیارکرے، نتیجتاََ مذاکرات قابل عمل ایسراسکان سرمننگ کتو۔ پاکستان دہشت گردی نا ویل انا پرامن ایسر، ہڑتوم آ ملک و جم وڑاٹ ڈیہہ انا شونہالی و سلامتی کن مخلصانہ کوشست و کمکاری آ قطر، ترکیہ و ایلو سنگت ملک آتا حکومت آتا است انا ہب اٹ منت واری ءِ ہرفک ۔ تینا شاری تا سلامتی پاکستان کن بے کچ اہمیت تخک۔ نن تینا الس ءِ دہشت گردی نا ناسور آن رکھ تخنگ کن غٹ المی گام گیج کینہ و اوفتے دا باور کرفنہ کہ حکومت پاکستان دہشت گرد، اوفتا ٹھکانہ، اوفتا سرپرست و کمکار آتے چٹفنگ کن درکار غٹ وسیلہ غاتے کاریم اٹ اتیک۔