مزن وزیر محمد شہباز شریف سعودی عرب ءِ تر ءُ تاب ءِ سرجم کنگ ءَ پد وطن ءَ واتر بوتگ

ریاض۔29اکتوبر  (اے پی پی): مزن وزیر محمد شہباز شریف سعودی عرب ءِ تر ءُ تاب ءِ سرجم کنگ ءَ پد وطن ءَ واتر بوتگ۔ چار شمبے ءِ روچ ءَ ریاض ءِ ڈپٹی گورنر شہزادہ محمد بن عبدالرحمن بن عبدالعزیز ءَ کنگ خالد میاں اوستمانی بالی پٹ ءَ مزن وزیر ءُ پاکستانی ڈل ءَ چہ الوداع کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ تر ءُ تاب ءِ ساھت ءَ مزن وزیر ءَ ولی عہد ءُ سعودی عرب ءِ مزن وزیر شہزادہ محمد بن سلمان بن عبدالعزیز السعود ءَ گوں گند ءُ نند کتگ ایشی ءِ ساھت ءَ پاکستان ءُ سعودی عرب ءِ نیام ءَ اقتصادی کمک ءِ فریم ورک ءِ بندات کنگ بوتگ۔ اے فریم ورک پاکستان ءُ سعودی عرب ءِ نیام ءَ اقتصادی سیادی آنی تہ ءَ نوکیں باب ءِ بندات اِنت۔ فریم ورک پاکستان ءُ سعودی عرب ءِ نیام ءَ دیریں سیادی ءَ را گیش مھکم کنگ ءِ تہ کلیدی کرد پیلو کنت۔ دوئیں ملک آنی نیام ءَ کمک ءِ نوکیں راہ آنی شوھازگ ءَ اقتصادی کمک کلیدی کرد ءَ پیلو کنت۔ اے رد ءَ دوئیں ملک آنی نیام ءَ توان، صنعت، کان کنی، انفارمیشن ٹیکنالوجی، جان سلامتی، کشت ءُ کشاری ءُ وردن ءُ وراک ءِ سیکورٹی ءِ شوبگ آنی تہ ءَ دوئیں ملک آنی نیام ءَ تعاون ءِ سر ءَ کار کنگ بیت، پرائیویٹ سیکٹر ءِ کرد ءَ را گیش کنگ ءُ تجارتی تبادلہ ءَ را دیمروئی دیگ بیت۔ دوئیں ملک آنی نیام ءَ پاکستان ءُ سعودی عرب ءِ بجلی ءِ ٹرانسمیشن منصوبگ ءُ توان ءِ شوبگ ءَ کمک ءِ ھوالگ ءَ مفاہمت نامہ ءِ سر ءَ دستخط کنگ ءَ ھوار دوئیں برجاھیں یکجائی منصوبگ آنی سر ءَ دستخط ھم ھوار کنگ بوتگ۔ مزن وزیر محمد شہباز شریف ءَ ریاض ءَ برجم داشتگیں 9می آیوکیں سرمایہ کاری ءِ گامگیج کانفرنس ءَ بہر زرتگ ءُ ’’انسانیت راستیں راہ ءَ روگ ءَ اِنت؟‘‘ ءِ سرھال ءِ سر ءَ گول میز ءِ تران ءَ پاکستان ءِ نقطہ نظر پیش کتگ۔ آئی ءَ وتی کلوہ ءِ تہ ءَ انسانی دیمروئی ءُ وشھالی ءِ واستہ جھان ءِ کمک ءِ ضلورت ءِ سر ءَ زور پر دات۔ مزن وزیر محمد شہباز شریف ءَ سعودی ولی عہد ءُ مزن وزیر شہزادہ محمد بن سلمان ءِ دیمروئی ءِ واستہ وژن ءُ جہانی دیمروئی ءِ دیمروئی ءِ واستہ سعودی عرب ءِ کرد ءَ را ساڑات۔ آئی ءَ موسمی بدلی ءِ زیان رسیت ءُ پاکستان ءَ سیلاب ءِ سبب ءَ بوتگیں تباہی ءِ سر ءَ چمشانک دات ءُ گلوبل ساؤتھ ءِ گوما گلوبل نارتھ ءِ شریکداری ءِ سر ءَ زور پر دات۔ آئی ءَ ھاسیں رنگ ءَ پاکستانی ورنائیں کارکن آنی دیمروئی، وت جوڑیشتی ھیل کاری ءِ دیمروئی ءُ انفارمیشن ٹیکنالوجی ءِ شوبگ ءَ دیمروئی ءِ واستہ حکومت ءِ گامگیج آنی سر ءَ زور پر دات۔ تر ءُ تاب ءِ ساھت ءَ مزن وزیر ءَ ہائیر اکنامک فورم ءِ صدر ءُ چیف ایگزیکٹو آفیسر بورگا بوگھنڈے ءَ گوں ھم گند ءُ نند کت۔