پاکستان ءُ ترکیہ ءِ سیادی اسٹریٹجک شریکداری ءِ نوکیں دور ءَ داخل بوتگ انت، مزن وزیر شہباز شریف

اسلام آباد  ۔29اکتوبر  (اے پی پی): مزن وزیر محمد شہباز شریف ءَ ترکیہ ءِ جمہوریہ روچ ءِ درگت ءَ ترکیہ ءِ صدر رجب طیب اردوان ءُ ترکیہ ءِ براتیں اُلس ءَ را مبارکی دیان ءَ گوشت کہ پاکستان ءُ ترکیہ ءِ سیادی اسٹریٹجک شریکداری ءِ نوکیں دور ءَ داخل بوتگ انت۔ مزن وزیر ءَ ترکیہ ءِ 102می جمہوریہ روچ ءِ درگت ءَ وتی کلوہ ءِ تہ ءَ گوشت کہ اے وشیں موہ ءِ سر ءَ آئی ءَ وتی ءُ پاکستان ءِ الس ءِ نیمگ ءَ وتی گرانبھائیں برات صدر رجب طیب اردوان ءُ ترکیہ ءِ براتیں اُلس ءَ را مبارکی دات۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گوشت کہ گوستگیں دہ سال آنی تہ ءَ صدر اردوان ءِ جرات مند ءُ متحرک سروکی ءَ ترکیہ ءِ وشیں بدلی ءُ اقتصادی ریکوری ءَ را جھان ءِ تہ ءَ منگ بوتگ۔ مزن وزیر ئَ گوشت کہ مارا وتی ترک برات آنی سوب ءُ کامیات آنی سر ئَ پھر اِنت ءُ ما دیمروئی ئِ اے سفر ئَ آوانی مُھکمیں شریک آں۔ مزن وزیر ئَ گوشت کہ پاکستان ءُ ترکیہ ئِ نیام ئَ جغرافیہ ءُ وھد ئَ چہ دیم ئِ سیادی یکجائی قدر، راجدپتر ءُ براتی ئِ بنیات ئَ اَنت۔ آئی ءَ گوشت کہ مئے سیادی صدر اردوان ءِ زانتکاریں رہشونی ءِ چیر دستی ءَ اسٹریٹجک شراکت داری ءِ نوکیں دور ءَ داخل بوتگ اَنت، چیاکہ ما وھد ءِ ھرچ چکاس ءَ چہ گوزگ ءَ گوں یکجائی ءَ یکجائی مفاد ءِ درستیں پڑ آنی تہ ءَ برجمیں سیادی آنی دیمروئی ءِ واستہ کار کنگ ءَ ایں ۔