نائب مزن وزیر اسحاق دار ءَ سعودی ءِ دری کارانی وزیر شہزادہ فیصل بن فرحان ءَ گوں ریاض ءَ گند ءُ نند کتگ، اقوام متحدہ ءَ ھوار کثیر جہتی فورم آنی تہ ءَ کمک ءِ یکجائی جزم ءِ درشان

ریاض۔28اکتوبر  (اے پی پی):نائب مزن وزیر ءُ درئی کارانی وزیر سینیٹر محمد اسحاق دار ءَ ریاض ءَ سعودی ءِ دری کارانی وزیر شہزادہ فیصل بن فرحان ءَ گوں گند ءُ نند کت۔ سئے شمبے ءِ روچ ءَ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ دوئیں رہشون آنی نیام ءَ دو نیمگی سیادی، غزہ ءِ جاور ھال ءَ ھوار دمگی ءُ میاں اوستمانی دیمروئی آنی سر ءَ گپ ءُ تران کنگ بوتگ ءُ اقوام متحدہ ءَ ھوار کثیر نیمگی فورم آنی تہ ءَ کمک ءِ واستہ یکجائی جزم ءِ سر ءَ پدا زور پر داتگ۔ ایشانی تہ ءَ پاک سعودی ءِ کثیر نیمگی شریکداری ءَ را توامیں شوبگ آنی تہ ءَ گیش پراھی کنگ ءُ دوئیں ملک آنی نیام ءَ برات ءُ دوستی ءِ سیادی ءَ را گیش مھکم کنگ ءِ سر ءَ تپاک کنگ بوتگ۔ نائب مزن وزیر ءَ فیصل بن فرحان ءُ سعودی عرب ءِ سروکی ءَ را آیوکیں وھد ءِ سرمایہ کاری ءِ گامگیج فورم ءِ سوبمندیں میزبانی ءِ سر ءَ مبارک بات دات ءُ مزنیں مہمان داری ءِ سر ءَ شگر ءُ منت گپت۔