بنجائی وزیر ریلوائی محمد حنیف عباسی تون آل چائنا فیڈریشن آف انڈسٹری اینڈ کامرس نا سیکرٹری جنرل نا اوڑدہی

اسلام آباد۔ 28 اکتوبر (اے پی پی) آل چائنا فیڈریشن آف انڈسٹری اینڈ کامرس (اے سی ایف آئی سی) نا سیکرٹری جنرل جیانگ یی تینا ڈل اتون اوار بنجائی وزیر ریلوائی محمد حنیف عباسی تون اسلام آباد اٹی اہم اوڑدہی کرے، ہراٹی چین نا پنی آ لاجسٹک کمپنی تا نمائندہ غاک ہم اوار ئسر۔ وزارت ریلوائی نا کنڈآن جاری بیان نا رداٹ اوڑدہی ٹی ریلوائی نا بشخ اٹی زرکاری، تکنیکی کمکاری و اسیجائی ڈٹ آتا گمان تیا سرجمی اٹ گپ وتران مس۔ بنجائی وزیرریلوائی محمد حنیف عباسی ڈل ءِ پاکستان ریلوائی نا برجا و آخبت نا ڈٹ آتیان معلومدار کرے۔ اوپارے کہ کراچی آن روہڑی سیکشن آ ایشیائی شونداری بینک (اے ڈی بی) تون معاہدہ طے مسنے، وخت اس کہ روہڑی آن پشاور، نوکنڈی آن گوادر و ایم ایلک ۔2(ML-2)اٹک آن روہڑی ڈٹ آتیا چین اتون کمکاری نا گمان تیا سجفنگ انگ ءِ۔ محمد حنیف عباسی پارے کہ کراچی پورٹ آن پشاور اسکان ریلوائی ٹریک استنبول (آئی ٹی آئی) ریلوائی ڈٹ علاقائی رابطہ و جہانی واپار نا مون آ دننگ کن اہم اہمیت تخک۔ وزیر ریلوائی داوخت آ پارے کہ پاکستان ریلوائی بزنس ٹو بزنس (B2B)کمکاری و بلڈ آپریٹ ٹرانسفر (BOT)ماڈل نا رداٹ اسیجائی ڈٹ آتیکن ملوک ءِ۔ آخبت اٹ چین اتون تکنیکی شریداری اٹ فریٹ آپریشنز، لاجسٹک چین، و ریل انڈسٹری ٹی پوسکن آٹیکنالوجی درستی راستی کرفنگ نا گمان آک روشنا ءُ۔ اوپارے کہ چینی زرکاری آن پاکستان ریلوائی نا بنداوی پنجر نا اپ گریڈیشن، رفتار وکارکڑد اٹی نمان گچینی بریک و سلاہ ئی شریداری آن پاکستان ءِ ڈیہہ اٹی ریلوائی ٹرانزٹ حب مننگ نا روشنا ءُ موقع اس ملک۔ چینی ڈل پاکستان ریلوائی نا برجا اصلاحاتی گام گیج، وژن و پالیسی سمت انا ستاءِ کرے۔ اوڑدہی ٹی فریق آک آخبت اٹ فنی تربیت ، پوسکن آ نظام تا نفاذ و ریلوائی لاجسٹک نیٹ ورک نا مون آدننگ آ امنا کریر۔ بنجائی وزیر ریلوائی محمد حنیف عباسی داوخت آ پاکستان و چین نا نیام اٹ دیرپا زرگزرانی شریداری نا عزم انا درشانی ءِ کرسا پارے کہ ہڑتوم آ ملک آتا کمک آن ریلوائی نا بشخ اٹی شونداری نا پوسکن آ درگہ غاک ملنگرہ۔