پاکستان آن پولیو نا چٹفنگ حکومت پاکستان نا اولیت ءِ، بنجائی وزیر قومی جان جوڑی

اسلام آباد۔ 28 اکتوبر (اے پی پی) بنجائی وزیر قومی جان جوڑی سید مصطفیٰ کمال پارینے کہ پاکستان آن پولیو نا چٹفنگ حکومت پاکستان نا اولیت ءِ۔ وزیراعظم نا کماشی ٹی پاکستان آن پولیو نا پورو چٹفنگ نا پکا عزم کرینن۔ وزارت قومی جان جوڑی نا کنڈآن جاری بیان نا رداٹ داخیال آتا درشانی ءِ او چیئرمین پولیو اوور سائیٹ بورڈ ڈاکٹر کرس ایلس و ڈبلیو ایچ او نا ریجنل ڈائریکٹر ڈاکٹر حنان بلخی تون اوڑدہی ٹی کرے۔ اوپولیو نا چٹفنگ کن کروک آ گام گیج آتیا گپ وتران کرے۔ مچ آملک اٹی پولیو تور مہم آتا سرسہبی کن مربوط و گچین حکمت عملی اس جوڑ کرینن۔ بنجائی وزیر پارے کہ مچ آملک اٹی بڑزکو آب انا پولیو تور مہم آتے اڈتننگ انگ ءِ۔ سویلی خیبرپختونخواہ، نیامی پاکستان و کراچی تون اوار ہائی رسک ضلع غاتیا خصوصی چکار کننگ انگ ءِ۔ اوپارے کہ مذہبی و راجی راہشون تا کمک اٹ نمن کیس آتیٹی کمتی بننگ ءِ۔ پولیو پروگرام و رکھی ٹیکہ جات پروگرام نا نیام اٹ ہم گرنچی ءِ پین مون آ دننگ انگ ءِ۔ حکومت پاکستان رکھی ٹیکہ جات نا کوریج سوگو کننگ کن گچین گام گیج کننگ ءِ۔ داوخت آ چیئرمین پولیو اوور سائیٹ بورڈ، ڈاکٹر کرس ایلس پولیو نا برخلاف پاکستان نا گام گیج آتا ستاءِ کرساپارینے کہ پاکستان آن پولیو نا پورو چٹفنگ کن ہرکہول آ پبی کمکاری ءِ برجاتخنگک۔