بنجائی وزیر داخلہ محسن نقوی نا گوجرانوالہ ٹی نادرا سینٹر نا اناگت دورہ، شاری تا ویل آتے دمدستی ایسر کننگ نا پرمان

گوجرانوالہ۔ 28 اکتوبر (اے پی پی) بنجائی وزیر داخلہ محسن نقوی گوجرانوالہ ٹی نادرا سینٹر نا اناگت دورہ ءِ کرے، ہراڑے او شناختی کارڈز و ایلو دستاویز آتا جوڑ کرفنگ نا عمل نا سرجمی اٹ جاچ ءِ ہلک۔ وزیرداخلہ محسن نقوی سینٹر اٹی ساڑی شاری تتون اوڑدہی کرے و اوفتا ویل آتے بِنگ۔ شاریک نادرا سینٹر نا کارکڑد آ است جمی نا درشانی ءِ کرسا پارے کہ اوفتے زیات انتظار کروئی تمپک وعملہ کمک کیک۔ دورہ ٹی گڑاس کاؤنٹر آتیا رش انا جاچ آ وزیرداخلہ عملہ ءِ پارت کرے کہ شاری تا کاریم ءِ ترند رفتار ی اٹ مون تننگے تانکہ کس اسے تاخیر یا دشواری تون مون تننگپ۔ محسن نقوی چندی کاؤنٹر آتیا ہنا ، عملہ تون اوڑدہی کرے و اوفتے خواری ، زمواری ، و جوانی اٹ فرض سرتننگ نا پارت کرے۔ اوموقع غا انچارج نادرا سینٹر ءِ شاری تا ویل آتا دمدستی ایسری نا پرمان جاری کرے۔ بنجائی وزیر داخلہ محسن نقوی پارے کہ ’’خوشی ءِ کہ شاریک نادرا سینٹر نا کارکڑد آن است جم ءُ، رش آن پد ہم عملہ نا کاریم اٹ اختہ مننگ ستاکڑزک۔ اومستی پارے کہ شاری تا کاریم کم آن کم وخت اٹی و آسراتی اتون بایدے پورو مرے، وخت اس کہ شناختی کارڈ ز و ایلو دستاویز آتیٹی تاخیر یا مشکل ءِ سگنگ پننگک۔ محسن نقوی زور شاغا کہ ’’نادرا سینٹر بروک آہر شاری وی آئی پی ءِ، اونا کاریم ءِ ہمودے آ کننگے و مقررہ مد اٹی دستاویز فراوان کننگے۔ شاریک وزیرداخلہ نا کنڈآن موقع غا پرمان جاری کننگ آ اونا منت واری ءِ ہرفیر و پاریر کہ نادرا سینٹر اٹی جم وڑاٹ خذمت آتا آب است جم ءِ۔