پاسڈیک دیوان اٹی پاکستان و اٹلی نا نیام اٹ ماربل نا آب، ٹیکنالوجی نا ہل و تس، برآمد آتا مون آ دننگ آ گپ وتران

اسلام آباد۔ 28 اکتوبر (اے پی پی) وزیراعظم نا خصوصی کمکار صنعت و پیدوار ہارون اختر خان نا کماشی ٹی پاسڈیک (PASDEC)نا نمائندہ غاتون سے شنبے نادے آ دیوان اس مس، ہراٹی پاکستان واٹلی نا نیام اٹ ماربل نا آب، ٹیکنالوجی نا ہل و تس و برآمد آتا مون آ دننگ آ سرجمی اٹ گپ وتران کننگا۔ دیوان اٹی ہارون اختر خان پارے کہ پاکستان ناماربل انڈسٹری ٹی بے پناہ لائخی ارے ہراڑآن نئے بیرہ ملکی زرگزران ءِ فائدہ تننگ مریک بلکن روزگار نا ہزار آ پوسکن وارخواہی ہم ودی کننگ مریک۔ اوپارے کہ حکومت ماربل نا آب ءِ جہانی کہول اسکان بڑز کننگ کن ہرممکن کمکاری فراوان کیک تانکہ پاکستان نا ماربل ایکسپورٹ جہانی منڈی تیٹی مسابقتی حیثیت دوئی کننگ کے۔ ہارون اختر خان پارے کہ پوسکن آ ٹیکنالوجی و جہانی آب انا مشینری نا کاریم اٹ اتنگ آن ماربل نا کوالٹی ٹی نمان گچینی ممکن ءِ، ہراڑآن برآمد آتیٹی ودکی و نہادی زرمبادلہ نا بننگ گمانی ءِ۔ اومستی پارے کہ ماربل نا ایکسپورٹ ملکی زرگزران کن کٹیائی پک مریک و دا بشخ انا شونداری آن ہزار آ کسبکار بندغ آتے روزگار نا وارخواہی دوبریک۔ خصوصی کمکار پاسڈیک ءِ پارت کرے کہ ماربل نا آب اٹ گچینی و جہانی برآمدی لائخی ٹی ودکی کن اسہ جوان ءُ ڈٹ اس اسہ ہفتہ نا تہہ ٹی تیار کرسا پیش کننگے۔