پاکستان ءُ اٹلی ءِ نیام ءَ سنگ مرمر ءِ کوالٹی ءِ دیمروئی، ٹیکنالوجی ءِ تبادلہ ءُ برآمدات ءِ ھوالگ ءَ پیاسڈیک ءِ دیوان برجم دارگ بوت

اسلام آباد۔28اکتوبر  (اے پی پی): مزن وزیر ءِ صنعت ءُ کامرس ءِ ھاسیں کمکار ہارون اختر خان ءِ سروکی ءَ پیاسڈیک ءِ نمائندگ آنی گوما یک شمبے ءِ روچ ءَ گند ءُ نند بوت، ایشی ءِ تہ ءَ پاکستان ءُ اٹلی ءِ نیام ءَ سنگ مرمر ءِ کوالٹی ءِ دیمروئی، ٹیکنالوجی ءِ تبادلہ ءُ برآمدات ءِ ھوالگ ءَ سرجمیں رنگ ءَ ھیال ءُ لیکہ آنی مٹ ءُ بدلی کنگ بوت۔ گند ءُ نند ءَ گشتانک دیان ءَ ہارون اختر خان ءَ گوشت کہ پاکستان ءِ سنگ مرمر ءِ صنعت ءِ تہ ءَ بے دروریں گنجائش است انت کہ ایشی ءَ چہ نہ ایوک ءَ ملکی معیشت ءَ را نپ رس ایت بلکینگ ءَ ھزاراں نوکیں روزگار ءِ موہ ھم پیداک بوت کنت۔ آئی ءَ گوشت کہ حکومت سنگ مرمر ءِ کوالٹی ءَ را میاں اوستمانی تک ءَ سر کنگ ءِ واستہ ھمک رنگ ءِ کمک ءَ کنت تانکہ پاکستان ءِ سنگ مرمر ءِ برآمدات ءَ را جھان ءِ مارکیٹ آنی تہ ءَ مقابلہ ءِ برتری رس ایت۔ ہارون اختر خان ءَ گوشت کہ نوکیں ٹیکنالوجی ءُ میاں اوستمانی معیار ءِ مشینری ءِ کارمرد کنگ ءَ چہ سنگ مرمر ءِ کوالٹی ءَ را مزنیں کساسے ءَ گہتری اتک کنت ایشی ءَ چہ برآمدات ءَ را گیش کنگ ءُ درملکی زرّ ءِ کمائی ءِ گمان اِنت۔ آئی ءَ گیش گوشت کہ سنگ مرمر ءِ برآمد ملک ءِ معیشت ءِ واستہ فائدگ مند ثابت بیت ءُ اے شوبگ ءِ دیمروئی ءَ چہ ھزاراں زانتکاریں مردم آناں روزگار ءِ موہ رس ایت۔ ھاسیں کمکار ءَ پاسڈیاک ءَ را ہدایت کت کہ آ یک ہفتگے ءِ تہا یک جامع منصوبگ ءِ تیاری ءُ جمع کنگ ءَ انت تانکہ سنگ مرمر ءِ کوالٹی ءَ را گہتر کنگ ءُ ایشی ءِ عالمی برآمداتی صلاحیت ءَ را گیش کنگ بہ بیت۔