وفاقی وزیر برائے تجارت جام کمال خان ءَ یورپی پارلیمنٹ ءِ دیمروئی کمیٹی ءِ مزن تک ءِ ڈل ءَ گوں گند ءُ نند کتگ، یورپی پارلیمنٹ ءَ جی ایس پی پلس فریم ورک ءِ چیر دستی ءَ پاکستان ءِ گوما مھکمیں شریکداری ءِ جزم ءِ پدا پدر کتگ

اسلام آباد۔27اکتوبر  (اے پی پی): یورپی پارلیمنٹ ءِ دیمروئی کمیٹی ءِ مزنیں تک ءِ ڈل ءَ گوں وفاقی وزیر تجارت جام کمال خان ءَ گند ءُ نند کت۔ ڈل ءِ سروک لوکاس منڈل (آسٹریا) بوتگ ءُ دگہ باسکاں رابرٹ بیڈرو (پولینڈ)، جوآن فرنینڈو لوپیز ایگیولر (سپین)، ٹوماس زیڈیچوسکی (چیکیہ) اور مارک جونگن، کرسچن ایڈوائزر، جینیٹا کجکووا اور  ٹریسا پائولا ڈی فیگیریڈو  ھوار بوتگ انت۔ وفاقی وزیر تجارت جام کمال خان ءَ ڈل ءِ گوما سرجمیں گپ ءُ تران کت ءُ ایشاں وزارت تجارت اسلام آباد ءِ تر ءُ تاب ءَ ھم برت۔ ڈل ءِ ھمبراھی ءَ پاکستان ءَ یورپی یونین ءِ سفیر ریمنڈ کروبلس ھم ھوار اَت۔ گند ءُ نند ءَ یورپی یونین ءُ پاکستان ءِ سیادی ءَ را مھکم کنگ ءِ واستہ پاکستان ءِ برجاھیں جزم ءِ سر ءَ زور پر دیگ بوت، ھاسیں رنگ ءَ جنرلائزڈ اسکیم آف پریفرینسز پلس (جی ایس پی پلس) ءِ چیر دستی ءَ ایشی ءَ پاکستان ءَ پائیدار تجارت، دیمروئی کمک ءُ انسانی ھک آنی دیمروئی ءِ تہ ءَ مزنیں کرد پیلو کتگ۔ جام کمال خان ءَ ڈل ءِ پجار کنان ءَ تر ءُ تاب کنوکیں باسک آنی دیریں شریکداری ءِ سر ءَ شگر ءُ منت گپت۔ آئی ءَ یک رندے پدا گوشت کہ پاکستان یورپی یونین ءِ گوما ھواریں اقتصادی دیمروئی، جوانیں حکومت داری ءُ برجائی دیمروئی ءِ واستہ وتی کمک ءَ را ارزشت دنت۔ آئی ءَ جی ایس پی پلس مانیٹرنگ فریم ورک ءِ چیر دستی ءَ پاکستان ءِ پیشرفت ءِ بابت ءَ ڈل ءَ را سرپد کت ءُ انسانی ھک، لیبر ریفارم، موسمیاتی کارروائی ءُ ادارگی مھکم کنگ ءِ تہ ءَ مزنیں پیشرفت ءِ سر ءَ چمشانک دات۔ وفاقی وزیر ءَ گوشت کہ پاکستان 2026-2028 ءِ وھد ءِ واستہ اقوام متحدہ ءِ انسانی ھک آنی کونسل ءِ تہ گچین کنگ بوتگ، ایشی ءَ چہ انسانی ھک آنی ھوالگ ءَ کثیر جہتی کمک ءَ را دیم ءَ برگ ءِ واستہ وتی کرد ءِ سر ءَ جھان ءِ دل یکیمی ءِ درشان اِنت۔ جام کمال خان ءَ ڈل ءَ را سرپد کت کہ پاکستان ءَ آروس ءِ قانونی عمر ہم آہنگی کتگ ءُ چائلڈ میرج ریسٹرنٹ ایکٹ 2025 منظور کتگ کہ اے قانونی ایکٹ انت۔ دگہ ھاسیں قانون سازیں گامگیج آنی تہ ءَ اھوالکار ءُ میڈیا ءِ پیشہ ور آنی رکھینگ ءِ کمیشن ءِ جوڑ کنگ، اقلیت آنی واستہ راجی کمیشن ءُ بین المذاہب ءِ ھمگرنچی ءِ بینک ءِ جوڑ کنگ ھوار اِنت۔ آئی ءَ گوشت کہ پاکستان ملکی سرمایہ کاری ءِ واستہ سازگاریں چاگرد جوڑ کنگ ءِ واستہ کوشست ءَ را برجاہ دارگ ءَ انت۔ ایشاں مزنیں ٹیکس، توانائی ءِ ھرچ ءُ درچ ءُ سود ءِ شرح ءِ چیلنج آناں گیواری ءِ واستہ حکومت ءِ گامگیج آنی سر ءَ ھیال ءُ لیکہ ءِ درشان کت۔ جام کمال ءَ گوشت کہ پاکستان ءِ اقتصادی آیوکیں وھد صنعتی دیمروئی، مہارت ءِ دیمروئی ءُ انسانی وسیلگ آناں بااختیار کنگ ءِ تہ ءَ اِنت، چیاکہ پاکستان ءِ 250ملین آبادی ءِ تہ ءَ 60درسد ءَ چہ گیش مردم 30سال ءَ چہ کم عمر اَنت۔ مینوفیکچرنگ، ایس ایم ایز ءُ ای کامرس ءِ سرا کار کنگ ءَ انت۔ آئی ءَ یورپی کمپنی آناں ٹیکنالوجی ءِ ٹرانسفر، پائیدار کاشتکاری ءُ فوڈ چپ ءِ جدت ءِ تہ ءَ پاکستان ءِ گوما شریک بوھگ ءِ دعوت دات۔ وزیر تجارت ءَ پارلیمانی ڈل ءِ گوما ھاسیں تجارتی جیڈھ ھم چست کتگ اَنت ایشی ءِ تہ ءَ جی ایس پی پلس ءِ چیر دستی ءَ پاکستان ءِ ایتھنول ءِ برآمدات ءِ سر ءَ ڈیوٹی ءِ چھوٹ ھوار اِنت۔ مراعات پدا اتکگ انت کہ آہاں روزی روٹی ءُ کاشتکاری ءِ کمیونٹیز ءَ را سک باز تاوان داتگ۔ ایشی ءَ ابید بسمتی برنج ءِ جغرافیائی اشارہ (جی آئی) ءِ رجسٹریشن ءِ جیڈھ ءِ سر ءَ ھم گپ ءُ تران کنگ بوت۔ وفاقی وزیر برائے تجارت ءَ یورپی یونین ءَ را زور پر دات کہ آ یک انچیں منصفانہ ءُ غیر جانبدار فصل ءِ جوڑ کنگ ءَ انت کہ آ پاکستان ءِ میراث ءُ جہانی نامداریں برنج ءِ وڑ ءُ پیم ءِ حقی دعویٰ ءَ را من ایت۔ آئی ءَ اے گپ ءِ سر ءَ زور پر دات کہ دوئیں جیڈھ پاکستان ءِ معیشت ءُ لاکھوں کشت ءُ کشاری ءِ زندمان ءِ واستہ انت۔ آئی ءَ گوشت کہ ھاسیں رنگ ءَ انوگیں ھڑتال آنی رد ءَ کہ ایشی ءَ چہ کشت ءُ کشاری شوبگ ءَ را تاوان رستگ، پاکستان وتی گنجائش آناں مھکم کنگ ءِ واستہ یورپی یونین ءِ نیمگ ءَ چہ تکنیکی کمک ءُ گنجائش سازی ءِ ودار ءَ اِنت۔ وزارت تجارت ءُ دانشورانہ ملکیت ءِ گل ءِ مزنیں حکام ءَ ڈل ءَ را سرپدی دات کہ پاکستان ءَ ٹریڈ مارک ءِ بابت ءَ میانجی داری پروٹوکول ءُ نابینا آنی حق آنی بابت ءَ مراکش پروٹوکول ءِ تہ ءَ ھوار بوھگ ءِ فیصلہ کتگ ایشی ءِ چیر دستی ءَ پیٹنٹ ءُ کاپی رائٹ ءِ بابت ءَ گیش اصلاحات کنگ بوھگ ءَ انت۔ ڈل ءَ را سرپد کنگ بوت کہ سرمایہ کار آنی اعتماد ءَ را گہتر کنگ ءِ واستہ حکومت ءِ واستہ آئی پی ءِ مھکمیں کانود اولی ترجی انت۔ یورپی پارلیمنٹ ءِ باسک آں پاکستان ءِ دیمروئی ءِ ھوار بوھگ، گپ ءُ تران ءِ تہ ءَ پچیں رنگ ءُ حکومت ءِ اصلاحات ءُ انسانی سرمایہ ءِ دیمروئی ءِ سر ءَ دلگوشی ءِ توسیپ کت۔ آئی ءَ پاکستان ءِ پنت ءُ شون ءِ وش اتک کت ءُ یک رندے پدا گوشت کہ یورپی یونین گپ ءُ تران، شفافیت ءُ شریکداری ءِ تہ ءَ پاکستان ءِ رہشونی ءَ برجاہ دار ایت۔ ڈل ءَ امن، وانگ ءُ زانگ ءُ اقتصادی کمک ءِ شوبگ آنی تہ ءَ جھان ءِ جیڈھ آنی سر ءَ ھم ھیال ءُ لیکہ درشان کتگ۔ ڈل ءَ پاکستان ءِ مہمان داری ءَ را ساڑات ءُ جھان ءِ تک ءَ جمہوریت ءُ انسانی ھک آنی ھوالگ ءَ کمک ءَ را گیش مھکم کنگ ءِ ارزشت ءِ سر ءَ وتی ھیال آنی درشان کت۔