کشمیری الس اسہ دے آجوئی نا مزل آن ضرور ہمکنار مریرہ، بنجائی وزیر ڈٹ بندی، شونداری و خصوصی گام گیج پروفیسر احسن اقبال نا یوم سیاہ کشمیر آ کلہو

اسلام آباد۔ 27 اکتوبر (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال ’’یوم سیاہ کشمیر‘‘ نا وخت آ تینا کلہو اٹی پارینے کہ دادے بھارت نا غیرکانودی کوزہ و کشمیری الس نا بنداوی حق انا بھلا خلاف ورزی تا یات ترفک۔ پروفیسر احسن اقبال پارینے کہ 27 اکتوبر 1947تاریخ نا ہمو تہاردے ءِ ہراتم بھارت کشمیری تا است خواہی و اقوا م متحدہ نا قرارداد آتا برعکس وادی کشمیر آجبری تسلط قائم کرے۔ اوپارے کہ بھارت کشمیری الس نا توار ءِ توننگ اٹ بے سہب مسنے و کشمیر نا آجوئی نا جہد اسہ دے اس ضرور سرسہب مریک ۔ بنجائی وزیرپارے کہ پاکستان مدام کشمیری الس نا حق خودارادیت نا سیاسی، سفارتی و اخلاقی مخ تفی ءِ برجاتخک۔ اوداعزم انا درشانی ءِ کرے کہ کشمیری الس نا بے مٹ قربانیک اسُل زیان مفسہ، بلکن او اسہ دے آجوئی نا مزل آن ضرور ہمکنار مریرہ۔ پروفیسر احسن اقبال پارے کہ پاکستان نا حکومت و الس، مظلوم کشمیری تتون یکجہتی نا درشانی ءِ کیرہ و اوفتا روا جہد اٹی اوفتے تون ہم کوپہ سلوک ءُ۔ اوجہانی برادری آ زور شاغا کہ او بھارت ءِ جموں وکشمیر اٹی انسانی حق انا بھلا خلاف ورزی تے بند کننگ و کشمیری تے اقوام متحدہ نا قرارداد آتا رداٹ حق خودارادیت تننگ آ بیوس کے۔ اوپارے کہ کشمیری الس تون سلوک اُن و سلنہ، ہراتم اسکان او آجوئی نا مزل آتے دوئی کپسہ۔