بنجائی وزیر واپار جام کمال خان تون یورپی پارلیمنٹ نا کمیٹی شونداری نا اسہ بڑزکو کہولی ڈل انا اوڑدہی

اسلام آباد۔ 27 اکتوبر (اے پی پی) بنجائی وزیر واپار جام کمال خان تون یورپی پارلیمنٹ نا کمیٹی شونداری نا اسہ بڑزکو کہولی ڈل اس دوشنبے نادے آ اوڑدہی کرے۔ ڈل انا کماشی ءِ لوکاس منڈل (آسٹریا) کرے وخت اس کہ ایلو باسک آتیٹی رابرٹ بیڈرو (پولینڈ) ، جوآن فرنینڈولوپیز ایگیولر(سپین)، ٹوماس زیڈیچوسکی(چیکیہ ) و مارک جونگن، کرسچن ایڈوائزر، جینیٹاکجکووا و ٹریساپاؤلاڈی فیگیریڈور اوار ئسر۔ بنجائی وزیر واپار جام کمال خان ڈل اتون جوان ہیت کرے و اوفتے وزارت واپار اسلام آباد نا دورہ ءِ ہم کرفے۔ پاکستان اٹ یورپی یونین نا سفیر ریمنڈاس کروبلس ہم ڈل اتون اوار ئس۔ اوڑدہی ٹی یورپی یونین۔ پاکستان تعلقداری تے سوگو کننگ کن پاکستان نا پدریسہ عزم آ زور شاغنگا، خاص وڑاٹ جنرلائزڈ اسکیم آف پریفرنسز پلس(جی ایس پی پلس) فریم ورک انا رداٹ ہراپاکستان اٹ پائیدار واپار ، شونداری کمکاری و انسانی حق ءِ مون آ دننگ اٹ اہم کڑد ادا کرینے۔ ڈل انا خیرمقدم ءِ کرسا جام کمال خان دورہ ءِ کروک آ پارلیمنٹ نا باسک آتا متکن آ شریداری آ منت واری ءِ ہرفے۔ اوداہیت آ است جمی نا درشانی ءِ کرے کہ پاکستان جوان اقتصادی شونداری، گڈگورننس و پائیدار شونداری ءِ مون آ دننگ اٹ یورپی یونین تون تینا کمکاری ءِ قدر انا نظر اٹ ہرک۔ اوڈل ءِ جی ایس پی پلس مانیٹرنگ فریم ورک انا رداٹ پاکستان نا ساڑی آ سرسہبی تا بارواٹی معلومدار کرے، ہراٹی انسانی حق، لیبرریفارمز، کلائمیٹ ایکشن و ادارہ جاتی سوگوی نا بابت اہم پیش رفت ءِ مون آ تخا۔ بنجائی وزیر پارے کہ پاکستان ءِ 2026-2028نا مد اکن اقوام متحدہ نا انسانی حق کونسل کن گچین کننگانے ہرا گپ وتران و کثیر الجہتی انسانی حق انا کمکاری ءِ مون آدننگ اٹ اونا تعمیری کڑد آ جہانی پت انا عکاسی ءِ کیک۔