وزیراعظم شہباز شریف نا تھائی لینڈ و کمبوڈیا نا نیام اٹ امن معاہدہ غا ہڑتوم آ ملک آتا سرکڑدہ و الس ءِمبارکباد

اسلام آباد۔ 27 اکتوبر (اے پی پی) وزیراعظم محمد شہباز شریف تھائی لینڈ و کمبوڈیا نا نیام اٹ امن معاہدہ ءِ امن و سفارتکاری کن تاریخی گوندسا ہڑتوم آ ملک آتا سرکڑدہ و الس ءِ مبارکبادی تسنے و امن معاہدہ کن صدر ٹرمپ انا اہم کڑد انا ستاءِ کرینے۔ دوشنبےنادے آ راجی رابطہ نا ویب سائٹ ’’ایکس‘‘ آ جاری بیان اٹی وزیراعظم پارے کہ امن و سفارتکاری کن دااسہ پین تاریخی ءُ دے اسے، کمبوڈیا و تھائی لینڈ نا سرکڑدہ و الس ءِ کوالالمپور امن معاہدہ غا مبارکبادی ایتیوہ۔ وزیراعظم پارے کہ او امریکہ نا صدر ڈونلڈ ٹرمپ ءِ ہم خراج تحسین پیش کیک ہرا کوالالمپور معاہدہ، غزہ امن ڈٹ و دے ٹک نیامی و سویلی ایشیاٹی امن وسوگوی کن پبی کوشست آتا کمک اٹ جہانی امن ءِ مون آدننگ اٹ اہم کڑد ادا کرے ہراڑآن مچ آدنیا ٹی لکھ آ زندآتے بچفنگا۔ وزیراعظم پارے کہ او تینا ایلم ملائیشیا نا وزیراعظم انور ابراہیم ءِ ہم ڈیہہ اٹی امن وہم گرنچی کن کوشست آتیا خراج تحسین پیش کیک۔