جہانی برادری بھارت ءِ کشمیر نا بارواٹی اقوام متحدہ نا قرارداد آتیا عملدرآمد کن بیوس کے، بنجائی وزیر قومی غذائی رکھ و پٹ وپول نا کلہو

اسلام آباد۔ 27 اکتوبر (اے پی پی) بنجائی وزیر قومی غذائی رکھ و پٹ وپول رانا تنویر حسین پارینے کہ یوم سیاہ کشمیر مظلوم کشمیری الس نا جہد آجوئی و ظلم انا انجام نا یات ترفک ۔ اوپارے کہ 27 اکتوبر 1947ء آ بھارتی فوج جموں وکشمیر آ غیرکانودی کوزہ کریسس، ہرادے ءِ مچ آ کشمیری قوم ہرسال تہاردے انا وڑاٹ اڈ ایتک۔ دوشنبےنادے آ تینا کلہو اٹی رانا تنویر حسین پارے کہ وادی کشمیر اینو ہم قربانی، صبر و حوصلہ نا لازوال داستان اس نوشتہ کننگ ءِ۔ ظلم و جور انا مرغن انگا نن آن پد ہم کشمیری الس نا حوصلہ بڑز ءِ، و آجوئی نا پوسکن آ سہب داسہ زیات مراف۔ اوپارے کہ پاکستان کشمیری الس تون اوار ئس، و مدام اوار سلک ۔ پاکستان نا حکومت و الس کشمیری ایلم و ایڑھ تا سیاسی، سفارتی و اخلاقی مخ تفی ءِ ہمووخت اسکان برجاتخک، ہراتم اسکان اوفتے حق خودارادیت دوئی مفک۔ بنجائی وزیرپارے کہ کشمیر نا چنا، لمہ و ورناک حریت و قربانی نا پوسکن ءُ تاریخ اس نوشتہ کرینو۔ اوفتا بہادری و استقامت مچ آ انسانیت کن کسر نا ڈیواءِ۔ رانا تنویرحسین زور شاغا کہ انسانیت ہموتم آ سرسہب مریک ہراتم کشمیر اٹی انصاف مرسا نظربریک۔ جہانی برادری ءِ مرے کہ او کشمیری تا ٹھپ آتیا مالم تخنگ کن مون آبرے و بھارت ءِ اقوام متحدہ نا قرارداد آتیا عملدرآمد کن بیوس کے۔ اوپارے کہ کشمیر بیرہ اسہ زیباءُ وادی اس اف بلکن دا حق و باطل نا نیام اٹ برجااسہ تاریخی جہد اسے نا پن ءِ ۔ کشمیری الس نا عزم، اوفتا قربانی و اوفتا اومیت ہی بروک آ چین تیکن آجوئی نا کلہو جوڑمریک۔