بھارت نا غیرکانودی کوزہ ٹی جموں وکشمیر اٹی انسانی حق انا سنگین خلاف ورزیک برجاءُ، بنجائی وزیر ریلوائی محمد حنیف عباسی نا کلہو

اسلام آباد۔ 27 اکتوبر (اے پی پی) بنجائی وزیر ریلوائی محمد حنیف عباسی یوم سیاہ کشمیر نا وخت آ کشمیری الس تون پبی یکجہتی نا درشانی ءِ کرسا پارینے کہ 27 اکتوبر 1947ء کشمیرنا تاریخ نا ہمو تہاردے ءِ ہراتم بھارت جموں وکشمیر آ غیرکانودی کوزہ نا بناءِ کرے، ہراکشمیری الس ءِ دہائی تیا تالان ظلم ، جور و محرومی ٹی اختہ کریر۔ تینا کلہو اٹی بنجائی وزیر ریلوائی پارے کہ کشمیری الس آجوئی کن بے مٹ قربانی تسنے واوفتا عزم اینو ہم برقرار ءِ۔ اوپارے کہ اگہ آجوئی نا قیمت ءِ چاہوئی ءِ تو کشمیری تیان ارفبو ہرا نسل درنسل بھارتی کوزہ نا سیخا ٹی زند ءِ تیر کننگ ءُ۔ محمد حنیف عباسی پارے کہ بھارت کودک کشمیری تا توار ءِ توننگ کن ظلم و بربریت نا غٹ حد آتے پار کرینے، وخت اس کہ 5 اگست 2019 نا غیرکانودی گام گیج بھارتی عزم ءِ بے نقاب کرے۔ اوپارے کہ بھارت نا غیرکانودی کوزہ ٹی جموں وکشمیر اٹی انسانی حق انا سنگین خلاف ورزیک برجاءُ و جہانی برادری بایدے داناسنجیدہ نوٹس ءِ ہلے۔ بنجائی وزیر ریلوائی زور شاغا کہ کشمیر نا ویل بیرہ اقوام متحدہ نا قرارداد آتا رداٹ ہی ایسر مننگ کیک۔ اوپارے کہ پاکستان کشمیری الس نا اخلاقی ، سفارتی و سیاسی مخ تفی ءِ ہرجہانی فورم آ برجاتخک انتئے کہ کشمیر پاکستان نا شہ رگ ءِ و کشمیری تا دڑد ننا قومی فرض ءِ۔ محمد حنیف عباسی پارے کہ کشمیری الس نا آجوئی نا جہد نئے بیرہ اوفتا حق خودارادیت نا چیدہ ءِ بلکن سویلی ایشیاٹی دیرپاامن نا ہم ضامن ءِ۔ اوعزم ظاہر کرے کہ پاکستان مدام کشمیری الس تون سلک و اوفتا جہد آجوئی ٹی ہر کہول آ اوفتا مخ تفی ءِ کرسا کیک۔