جموں وکشمیر اٹی بھارتی گام گیج اقوام متحدہ نا چارٹر، سلامتی کونسل نا قرارداد و چارمیکو جنیوا کنونشن نا پاش آن پاش خلاف ورزی ءِ، نائب وزیراعظم و وزیرخارجہ سینیٹر اسحاق ڈار نا کلہو

اسلام آباد۔ 27 اکتوبر (اے پی پی) نائب وزیراعظم و وزیرخارجہ سینیٹر محمد اسحاق ڈار کشمیری الس نا عزم و استقلال ءِ خراج تحسین پیش کرسا پارینے کہ کشمیر نا خصوصی حیثیت نا منسوخی، مون انگا کانود نا نافذ، غیر ہندی بندغ آتے ڈومیسائل جاری کرسا آبادیاتی پنجر اٹی بدلی و کشمیری سرکڑدہ غاتے قیدوبند اٹ تخنگ اقوام متحدہ نا چارٹر، سلامتی کونسل نا قرارداد و چارمیکو جنیوا کنونشن نا پاش آن پاش خلاف ورزی ءِ۔ بدترین پابندی و چیلنج آتیان پد ہم کشمیری تا جہد دلیری ، وقار و ثابت قدمی نا شاندار درور ءِ۔ کشمیر نا تہار دے انا وخت آ تینا خصوصی کلہو اٹی اوپارے کہ 27 اکتوبر 1947 ہمو تہار دے ءِ ہراتم بھارتی فوج سری نگر اٹی پترینگسا جموں وکشمیر آ غیرکانودی کوزہ کرے۔ تدوک آ 78 سال آن بھارت نا غیرکانودی کوزہ ٹی جموں و کشمیر نا الس بھارتی کوزہ گر فوج انا ظلم و جور و استبداد نا گواچی ءُ۔ اوپارے کہ اقوام متحدہ نا سلامتی کونسل تینا چندی قرارداد آتیٹی پیدوار وڑاٹ طے کریسس کہ جموں وکشمیرنا آخبت نا فیصلہ اقوام متحدہ نا چاروکی ٹی آجو و بے کنڈ ہلوک رائے شماری نا کمک اٹ مریک ولے بھارت داقرارداد آتا پدریسہ خلاف ورزی ءِ کرسا طاقت و جور انا زور آ تسلط قائم کرینے ۔ اوپارے کہ پاکستان مدام دا قرارداد آتا حرمت و مرکزیت نا پابند مسنے و جہانی برادری آ پدریسہ زور شاغسابسنے  تانکہ دا متکن آ جھیڑہ نا انصاف اٹ و آخبت ایسری ممکن مننگ کے۔ اوپارے کہ پنچ اگست 2019 نا غیرکانودی و اسہ کنڈی بھارتی گام گیج آتیان پد بھارت نا غیرکانودی کوزہ ٹی جموں وکشمیر اٹی انسانی المیہ پین سنگین مسنے۔ کشمیر نا خصوصی حیثیت نا منسوخی ، مون انگا کانود نا نفاذ، غیر ہندی بندغ آتے ڈومیسائل جاری کرسا آبادیاتی پنجر اٹ بدلی و کشمیری سرکڑدہ غاتے قیدوبند اٹی تخنگ اقوام متحدہ نا چارٹر ، سلامتی کونسل نا قرارداد و چارمیکو جنیوا کنونشن نا پاش آن پاش خلاف ورزی ءِ۔ اوپہلگام واقعہ غان پد بھارتی کمامدارآتا کنڈآن مقبوضہ جموں وکشمیر اٹی کریک ڈاؤن، بے گناہ کشمیری تا دزگیری، پوچھ گچھ و اُراتے دڑفنگ کون آ گام گیج آتیا بھاز گڑتی نا درشانی ءِ کرے۔ اوپارے کہ انسانی حق انا دا لتاڑتے اقوام متحدہ نا ادارہ و جہانی انسانی حق انا تنظیمک ہم دستاویزی دروشم اس تسنو۔