پاکستان ہر جہانی فورم آ کشمیر نا مخ تفی ءِ پور وواک اتون برجاتخک، بنجائی وزیر داخلہ محسن نقوی نا کلہو

اسلام آباد۔ 27 اکتوبر (اے پی پی) بنجائی وزیر داخلہ محسن نقوی کشمیر نا تہار دے انا وخت آ کشمیری الس تون پبی یکجہتی نا درشانی ءِ کرسا پارینے کہ پاکستان، کشمیری الس نا سیاسی، سفارتی و اخلاقی مخ تفی ءِ ہر جہانی فورم آ پورو واک اتون برجاتخک۔ تینا بیان اٹی اوپارے کہ 27 اکتوبر ہمودے ءِ ہراتم بھارت جموں وکشمیر آ غیرکانودی کوزہ کرسا تاریخ نا تہاردے اس نوشتہ کرے۔ بھارتی فوج 1947 آن مقبوضہ دامان ءِ ظلم ،جور وریاستی دہشت گردی نا عقوبت خانہ ٹی بدل کرینے۔ اوپارے کہ پیلٹ گن، جبری گمشدگی ، عدالت آ ن ایڑتر خون و زالبول آتا تذلیل بھارتی ظلم انا لرزہ خیز مکروہ دروشم ءُ۔ محسن نقوی کشمیر نا شہید، حریت راہشون ، بندی و مظلوم خاہوت آتے سلام پیش کرسا پارے کہ دا بہادر مخلوق بھارتی ظلم انا مون آ کاٹم ءِ شیف کتور۔ اوپارے کہ ہزار آ کشمیری ورناآجوئی نا قیمت ءِ تینا جون تے اٹ تسنو ولے جوزہ حریت اینو ہم شیف تمتنے۔ بنجائی وزیر داخلہ پارے کہ میڈیا بلیک آؤٹ ، انٹرنیٹ بندش و فوجی گھیڑ دامان ءِ قید خانہ ٹی بدل کرینے، ہراڑے ہر توار ءِ توننگ انگ ءِ۔ جہانی انسانی حق انا تنظیمک بھارت نا ظلم آ وار وار آ توار بڑزکرینو ولے دنیا نا خاموشی انصاف نا جہانی نظام آ اسہ سوج انا نشان اسے۔ محسن نقوی پارے کہ اقوام متحدہ نا قرارداد آک پیدواروڑاٹ امنا کیرہ کہ کشمیری الس ءِ تینا آخبت نا فیصلہ ءِ تینٹ کننگ نا حق دوئی ءِ ولے بھارت دا قرارداد آتے لتاڑسا نئے بیرہ جہانی کانود بلکن انسانیت نا حرمت ءِ ہم مجروح کرینے۔ اوقائد اعظم محمد علی جناح نا قول ’’کشمیر پاکستان نا شہ رگ ءِ‘‘ نا بابت پارے کہ دا بیرہ اسہ جملہ اس اف بلکن ننا قومی تشخص نا چیدہ ءِ۔ کشمیر نا ویل انا ایسری بیرہ کشمیری  الس نا است خواہی و اقوام متحدہ نا قرارداد آتا رداٹ ممکن ءِ۔ بنجائی وزیر داخلہ محسن نقوی پارے کہ پاکستان ظلم انا برخلاف کشمیری الس نا جہد اٹی مدام اوفتے تون سلک۔ اوپارے کہ دا کشمیری الس نا جہد پاکستان نا است انا دھڑکن ءِ۔