’’یومِ سیاہ کشمیر‘‘ ءِ درگت ءَ صدر آصف علی زرداری ءِ کلوہ

اسلام آباد۔27 اکتوبر  (اے پی پی):صدر آصف علی زرداری ءَ سیاہ کشمیر ءِ روچ ءِ موہ ءَ وتی پیغام ءِ تہ ءَ گوشت کہ 27اکتوبر 1947 ءَ بھارتی اُرد  سری نگر ءَ داخل بوتگ ءُ نہ ایوک ءَ میاں اوستمانی کانود ءُ اخلاقی اصول آنی سر ءَ پدریں رنگ ءَ خلاف ورزی کتگ بلکیں کشمیری راج ءِ واھشت آنی سر ءَ ھم پادمال کتگ ءُ ایشی ءِ آسر ءَ نوکیں راجدپتر ءِ تہ ءَ یک سیاہ تریں باب ءِ بندات بوتگ۔ صدر ءِ مملکت ءَ گوشت کہ بھارتی حکومت ءِ چیر دستی ءَ مقبوضہ جموں ءُ کشمیر ءِ بے گناھیں مردین، زالبول ءُ زھگ گوستگیں بازیں دہائی ءَ چہ بد تریں ریاستی زلم، زوراکی ءُ بنیاتی انسانی ھک آنی لگتمالی ءِ دیم پہ دیم بوھگ ءَ اَنت۔ آئی ءَ گوشت کہ ھمک سال اے روچ ءَ را سیاہ روچ ءِ رنگ ءَ دارگ ءِ مول ءُ مراد ایش انت کہ کشمیری راج ءِ دلیریں کوشست ءُ ابدمانیں قربانی آناں وتی وت واجئی ءِ ناگزیریں ھک ءِ واستہ زلم ءُ زوراکی ءِ دیم ءَ یک سیسہ ءِ دیوال جوڑ بوتگ انت۔ بھارتی ظلم ءُ زوراکی ءَ ابید ھم کشمیری آنی تب ءُ مئیل انگت ءَ برز اِنت۔ صدر آصف علی زرداری ءَ گیش گوشت کہ 5اگست 2019 ءَ پد بھارت ءَ وتی زھرناکیں پندل ترند کتگ اَنت۔ بھارتی سرکار ءَ یک نیمگی ءَ مقبوضہ جموں ءُ کشمیر ءِ ھاسیں بستار رد کت، فوجی محاصرہ کت، کشمیریانی مال ءُ مڈی ءِ ھلاس کنگ ءَ اجتماعی سزا ءِ رھبند ءِ سرا عمل کت ءُ سیاہیں کانود ایر کت کہ کشمیریانی بنیاتی آجوئیانی چست کنگ ءِ برابر انت۔ نقل و حرکت، رابطہ ءُ مچی ءِ سرا بندش ءِ ہمراہی ءَ جعلی مقابلہ، زندان ءِ تہا ٹارچر، غیر عدالت ءِ کشتار ءُ زوراکی ءَ بیگواہ کنگ ہم روچ ءِ دود جوڑ بوتگ انت۔ ہندوستان یک منظم منصوبہ ءِ رد ءَ کشمیری آں وتی سرڈگار ءَ اقلیت جوڑ کنگ ءِ کوشست ءَ انت۔ آئی ءَ گوشت کہ پاکستان ءِ ھلاپ ءَ بھارت ءِ انوگیں زوراکیں پالیشی آنی رد ءَ سیاہ روچ ءِ ارزشت گیش گیش بیت پرچا کہ جنوبی ایشیا ءَ پائیدار امن ءُ ایمنی ءِ انحصار جموں ءُ کشمیر جیڈھ ءِ انصاف ءُ برجائی ءِ گیواری ءِ سر ءَ اِنت کہ اے اقوام متحدہ ءِ سلامتی کونسل ءِ منوگری آنی رد ءَ اِنت۔ صدر زرداری ءَ چہ میاں اوستمانی براتی ءَ ھاسیں رنگ ءَ اقوام متحدہ ءُ میاں اوستمانی انسانی ھک آنی ادارگ آنی سر ءَ زور پر دات کہ آ مقبوضہ سرزمین ءَ برجاھیں سنگین ءُ منظم انسانی ھک آنی لگتمالی آنی واستہ بھارت ءَ را احتساب بہ کن اَنت، بھارتی ظلم ءُ زوراکی آناں زوت ھلاسی ءَ را دل یکیمی بہ کن اَنت ءُ اے دیریں جیڑھ ءِ گیواری ءَ جوانیں کرد پیلو بہ کن اَنت۔ اقوام متحدہ ءِ ذمہ واری انت کہ آ کشمیری الس ءَ گوں داتگیں وعدہ ءَ پیلو بہ کنت۔ آئی ءَ وتی کلوہ ءِ گڈ ءَ یک رندے پدا گوشت کہ پاکستان مقبوضہ جموں ءُ کشمیر ءِ الس ءِ جہد ءُ کوشست ءَ اخلاقی، سفارتی ءُ سیاسی کمک ءَ برجاہ دار ایت۔ پاکستانی راج گوں وتی کشمیری برات ءُ گہاراں سرجمیں یکوئی ءَ اوشتاتگ ءُ آہانی وت واجہی ءِ حق ءِ جہد ءَ مدام آہانی ہمراہ داری ءَ کنت۔