کشمیر ءِ آجوئی ءِ شپ نزیک اِنت، پاکستان ہر فورم ءَ کشمیریانی مول ءُ مراد ءِ جنگ ءَ برجاہ دار اِیت، انجینئر امیر مقام

لاہور۔26اکتوبر  (اے پی پی):کشمیر ءِ کارانی وفاقی وزیر گلگت بلتستان ءُ سیفرون ءِ انجینئر امیر مقام ءَ گشتگ کہ مقبوضہ جموں ءُ کشمیر، پاکستان ءُ سرجمیں دگنیا ءَ 27اکتوبر ءَ سیاہیں روچ ءِ رنگ ءَ دارگ بیت۔ اے روچ کشمیری گہار ءُ برات آنی گوما یکوئی ءِ درشان ءِ رنگ ءَ دارگ بیت ءُ داں کشمیری آناں وت واجئی ءِ ھک نہ رس ایت اے روچ گوں ھمے جوش ءُ جزبگ ءَ دارگ بیت۔ کشمیر ءِ سرا ہندوستان ءِ زالمیں قبضہ دیر ءَ برجاہ نہ بیت، کشمیریانی آجوئی ءِ جہد المی ءَ سوبمند بیت۔ آ یک شمبے ءِ روچ ءَ ایوان اقبال ءَ بلیک ڈے ءِ ھوالگ ءَ برجم داشتگیں پریس کانفرنس ءَ گوں گشتانک دیگ ءَ ات۔ اے موہ ءِ سرءَ آل پارٹی حریت کانفرنس ءِ سروک فیض احمد نقشبندی شبیر عثمانیءُ اے دگہ نمائندہ ہم ساڑی اتنت۔ انجینئر امیر مقام ءَ گشتگ کہ 27 اکتوبر 1947 ءَ ہندوستان ءَ ناجائزیں وڑے ءَ وتی اُرد کشمیر ءَ ایر کتگ ءُ کشمیر ءِ سرا قبضہ کتگ۔ کشمیری راج ءَ گوستگیں ہفت دہائی ءَ آجوئی ءِ ھاتر ءَ بے دروریں قربانی داتگ۔ داں انوگ ءَ 97 ہزار ءَ چہ گیش کشمیری شہید کنگ بوتگ انت کہ ایشانی تہا 8316 شہید جیل ءُ جعلی انکاؤنٹراں بوتگ انت۔ یک سد ہزار ءَ چہ گیش لوگ ھلاس بوتگ انت، 22 ہزار جنین آدم بیواہ بوتگ انت، یک ہزار 916 زہگ یتیم بوتگ انت، وھدے کہ 11 ہزار 229 جنین آدم زلم ءُ زوراکی ءِ آماچ بوتگ انت۔ آئی ءَ گوشت کہ کشمیری سروک یاسین ملک ءَ ھوار بازیں ھریات ءِ سروک زندان ءِ سکیاں برداشت کنگ ءَ اَنت وھدیکہ مقبوضہ وادی ءِ سر ءَ 9 سد ھزار ھندی اُرد  ءِ اُرش اِنت کہ ایشی ءَ مزنیں زندان ءِ رنگ ءَ جوڑ کتگ۔ امیر مقام ءَ چہ میاں اوستمانی براتی ءُ اقوام متحدہ ءَ گوں دزبندی کتگ کہ آ وتی قرارداد آنی سر ءَ عمل کنگ ءَ دل یکیمی بہ کن اَنت تانکہ کشمیری الس ءَ را انصاف ءُ آجوئی رس ایت۔ آئی ءَ گوشت کہ ھندوستان ءِ غاصب کنوکیں قبضہ دیر ءَ برجاہ بوت نہ کنت، زلم ءِ شپ نوں آسر بوھگ ءَ انت ءُ الم ءَ راستی ءُ انصاف ءِ سہب سہر بیت۔ وفاقی وزیر ءَ گوشت کہ مزن وزیر محمد شہباز شریف ءَ جھان ءِ تک ءَ کشمیر ءِ معاملہ ءِ واستہ دلیری ءَ گوں جنگ کتگ۔ پاکستان ءِ بامردیں اُرد اں فیلڈ مارشل عاصم منیر ءِ سروکی ءَ دژمن ءِ تکبر ءِ سرا زھر شانی کت۔ حق ءِ جنگ ءَ پد ہندوستان ءَ را کلوہ دیگ بوت کہ کشمیر ءِ جیڑہ مئے درئی پالیسی ءِ مرکزی نقطہ انت۔ آئی ءَ گوشت کہ دوشمبے ءِ روچ ءَ بیگاہ 10بج ءَ یک منٹ ءِ ھاموشی دارگ بیت، وھدیکہ اسلام آباد، مظفر آباد ءُ اے دگہ شھر آنی تہ ءَ یکوئی ءِ سیر ءُ جلسہ آنی برجم دارگ بیت۔ اے کجام ہم یک پارٹی ءِ جیڑہ نہ انت بلکیں سرجمیں پاکستان ءِ جیڑہ انت کہ ایشی ءِ سرا سرجمیں راج یک مشت انت۔ امیر مقام ءَ گوشت کہ پاکستان حکومت ءِ کشمیر کار آنی وزارت ءِ نگرانی ءَ سیمینار، مراگش، بینر ءُ فلیکس آنی وسیلگ ءَ دگنیا ءَ را کشمیر ءَ ھندی ظلم ءِ بابت ءَ سرپد کنگ بوھگ ءَ انت۔ آئی ءَ گوشت کہ اے موہ ءِ سر ءَ جتاجتائیں ملک آنی سفیر ءُ سفارتی نمائندگ آناں ھم سرپد کنگ بیت تانکہ کشمیر ءِ جیڈھ ءِ انصاف ءِ گیواری ءِ واستہ میاں اوستمانی براتی جوانیں کرد پیلو بہ کنت۔ وفاقی وزیر ءَ آزات کشمیر ءِ سیاسی جاور ھال آنی بابت ءَ گپ ءُ تران کنان ءَ گوشت کہ آزات کشمیر ءِ حکومت ءِ بدلی المی انت ۔ ن لیگ ءَ آزات کشمیر ءَ اپوزیشن بینچانی سر ءَ نندگ ءِ پیسلہ کتگ ءُ سرکار جوڑ کنگ ءَ پیپلز پارٹی ءِ ھک ءَ من ایت ۔ وفاقی وزیر ءَ گوشت کہ وفاقی حکومت آزاد کشمیر ءُ گلگت بلتستان ءِ دیمروئی ءِ واستہ ھمک رنگ ءِ کمک ءَ کنت تانکہ اے دمگ آنی الس ھم راجی دیمروئی ءِ میوہ آں چہ سیت چست بہ کن اَنت۔ خیبر پختونخوا ءِ ھوالگ ءَ جست ءِ پسو ءَ انجینئر امیر مقام ءَ گوشت کہ کے پی کے ءِ بنجاھی وزیر زمہ واری ءِ درشان ءَ بہ کنت۔ آئی ءِ گپ ءَ کے پی کے ءِ مردمانی جیڑہانی بابت ءَ ھم گپ نہ جتگ کہ اے گپ افسوس ءِ گپ اِنت۔ کے پی کے پاکستان ءِ بہر اِنت، آئی ءَ را وفاقی نظام ءَ چہ جتا پیش کنگ ملک ءِ یکوئی ءَ تاوان بار اِنت۔ اگاں پاک فوج کش ایت گڈا ملک ءِ ایمنی ءُ یکوئی دو روچ ءَ ھم برجاہ بوت نہ کنت۔ امیر مقام ءَ گیش گوشت کہ کشمیر ءِ کار آنی گوما سیادی داروکیں زمین ءُ جائیداد آنی رکھینگ ءِ واستہ ھم سرجمیں گامگیج کنگ بوھگ ءَ انت تانکہ ھرچ وڑیں درائیں مداخلت یا ناجائزیں قبضہ ءِ گر ءُ دار کنگ بہ بیت۔ گڈی ءَ آئی ءَ گوشت کہ کشمیری آنی قربانی بے سوب نہ بنت، آھانی آجوئی ءِ جنز زوت وتی منزل ءَ سر بیت، پاکستان ھمک دیوان ءَ کشمیری راج ءِ کلوہ ءِ جنگ ءَ برجاہ دار ایت۔ اے موہ ءِ سر ءَ آل پارٹی حریت کانفرنس ءِ سروک فیض احمد نقشبندی ءَ گوشت کہ 27 اکتوبر ھما روچ اِنت کہ ھندوستان ءَ سری نگر ءَ وتی اُرد  ایر کتگ ءُ ایشی ءِ سر ءَ قبضہ کتگ، ما انگت ھمے قبضہ ءَ رد کنیں۔ آئی ءَ پاکستان ءِ حکومت، مزن وزیر محمد شہباز شریف ءُ پاکستانی فوج ءِ شگر ءُ منت گپت ءُ گوشت کہ پاکستان ءَ مدام جھان ءِ تک ءَ کشمیری راج ءِ معاملہ ءَ را برجم داشتگ۔