360ارب روپئی نا خڑچ انا 31ڈٹ منظور، 342ارب روپئی نا 12ڈٹ آتے گڈیکو منظوری کن ایکنک آ گدریفنگا
اسلام آباد۔ 20 اکتوبر (اے پی پی) ڈپٹی چیئرمین ڈٹ بندی شونداری و اصلاحات سرتاج عزیز پارینے کہ حکومت توانائی نا تنکی نا مون ءِ توننگ کن ٹھوس گام گیج کننگ ءِ ہرانا سوب 2017-18ء ٹی ملک آن لوڈشیڈنگ اصل چٹک ، سی پیک نا رداٹ توانائی نا ڈٹ آتیا ترندی اٹ کاریم جاری ءِ ہرا پوروی نا مرحلہ غاتیٹی ءُ ۔ داخیال آتا درشانی ءِ او سینٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی بنجائی وزارت و صوبائی محکمہ غاتا بڑزکو کمامدارآک ساڑی ئسر۔ دیوان اٹی 360 ارب روپئی نا خڑچ انا 31ڈٹ منظور وخت اس کہ 342ارب روپئی نا خڑچ انا 12ڈٹ آتے ایکنک آ گڈیکو منظوری کن گدریفنگا۔ دیوان اٹی توانائی نا بابت 45ارب روپئی نا ڈٹ آتے منظور کننگا۔ سینٹرل ڈویلپمنٹ ورکنگ پارٹی نا دیوان اٹی وزارت توانائی بلوچستان مستونگ اسپلنجی ٹی 132میگاواٹ گریڈاسٹیشن نا جوڑ جاڑ و 132کلوواٹ ایس ڈی ٹی اسپلنجی ٹرانسمیشن لین انا جوڑ جاڑ کن 69 کروڑ 54لکھ 26ہزار روپئی نا خڑچ انا ڈٹ پیش کرے ہرافتے دیوان منظور کرے۔ وزارت توانائی تینا ارٹ میکو ڈٹ تربیلا ٹی 1410 میگاواٹ بجلی نا فراوانی نا بابت ودیکی ڈٹ پیش کرے ہراڑکن 4ارب 52کروڑ 86لکھ 50 ہزار روپئی نا خڑچ انا تخمینہ ءِ ہرادے دیوان مستی منظوری کن ایکنک آ گدریفے۔ وزارت توانائی تینا مسٹ میکو ڈٹ 500 کلوواٹ لاہورنا قطبی علاقہ نا سب اسٹیشن تون اوار اوار ٹرانسمیشن لین نا تنصیب نا پیش کرے ہرانا تخمینہ 21ارب 31کروڑ 24لکھ 6ہزار روپئی خلنگا ہرانا مسخت قطبی لاہور نا علاقہ نا بجلی نا ودوک آ طلب ءِ پورو کننگ نا ءِ ہرادے دیوان مستی منظوری کن ایکنک آ گدریفینے۔ وزارت توانائی نا اسہ پین ڈٹ اس 220 کلوواٹ جمرودسب اسٹیشن تون اوار اوار 220 کلوواٹ ٹرانسمیشن لین نا اپ گریڈیشن ءِ ہراڑکن 2ارب 45کروڑ 9 ہزار روپئی خڑچ پیش کننگا ہرادے دیوان منظور کرے۔ وزارت توانائی نا اسہ پین ڈٹ اس جمبر کلسٹر اٹی 1224میگاواٹ پاور پروجیکٹ نا ڈٹ ءِ ہراڑآ خڑچ انا تخمینہ 15ارب 54کروڑ 59لکھ روپئی ءِ ہرادے دیوان مستی منظوری کن ایکنک آ گدریفے۔ وزارت توانائی ضلع شانگلہ ٹی 132کلوواٹ پوسکن آ گریڈ اسٹیشن نا جوڑ جاڑ کن 56کروڑ 14لکھ 76ہزار روپئی نا خڑچ انا ڈٹ پیش کرے ہرانا مسخت تحصیل مارتونگ نا صارف آتے کن پوسکن ءُ کنکشن تننگ، وولٹیج پروفائل ءِ گچین جوڑ کننگ ، لین لاسز ءِ کم کننگ نا ءِ ہرادے دیوان منظور کرے۔

متعلقہ مضامینمصنف کی طرف سے مزید