اقوام متحدہ۔22ستمبر(اے پی پی) اقوام متحدہ ءِ جنرل اسمبلی ءَ گوں تران کنانءَ مزن وزیر شاہد خاقان عباسی ءَ گشتگ کہ پاکستان اوگانستان ءِ جنگءَ را وتی سرڈگارءِ سرءِ کنگءِ موکلءَ نہ دنت۔ آئی ءَ گشتگ کہ اوگانستان ءَ فوجی یا سیاسی مھتلی ءِ ھاترءَ بھتان جنگ ھاس پاکستانءِ ھاترءَ تکانسریءِ گپ اِنت۔ آئیءَ گشتگ کہ پاکستان ءَ ناشرکاری ءِ ھلاپءِ میاں اوستمانی جنگءَ باز مالی ءُ جانی تاوان چست کتگ۔ آئیءَ گشتگ کہ مہ کسے ءِ ھاترءَ قربانی ءِ بُراک جوڈ بوھگءَ ساڑی نہ اَنت۔ طالبانءِ محفوظیں ٹھکانگ پاکستانءَ نہ اَنت بلکیں اوگانستان ءَ طالبانءَ بازیں دمگے ءِ سرءَ قابضہ کتگ۔ آئیءَ گشتگ کہ سیمسرآں آ دیم اُرش الم ءَ بنت بلے اے اُرش سیمسرآں آ دیم استیں ناشرکارانی محفوظیں ٹھکانگاں چہ کنگ بنت۔ اے وڈیں اُرشانی گرءُ دار کنگءِ ھاترءَ پاکستان ءَ اوگان حکومت ءُ اتحادی فورس آں گشتگ کہ آ سیمسرآں کنٹرول کنگءِ نظامءَ را مھکم جوڈ کنگءُ آھگءُ رؤگءِ سرپانکی کنگءِ ھاترءَ پاکستانءِ دراھیں کوشستانی ھمراھ داریءَ کنت۔ آئیءَ گشتگ کہ گوستگیں بازیں وھداں چہ درملکی دست مان بوھگءَ چہ دوھیں ملک آنی اُلسءَ را سک باز نقصان بوتگ۔ آئیءَ گشتگ کہ پاکستان ءَ چہ گیش اوگانستانءَ امنءُ ایمنی ءِ دگہ واھشت مند نیست بلے اوگانستانءَ 16سالی جنگءَ پد اے گپ پدر اِنت کہ اوگانستان ءَ امنءُ ایمنی ءَ را جنگ جاری کنگءَ بحال کنگ نہ بیت۔ کجام ھم فریق یکے دومی ءِ سرءَ فوجی گیشءُ گیواری لاگو کُت نہ کنت۔ آئیءَ گشتگ کہ پاکستان اے گپءِ سرءَ باور کنت کہ اوگانستان ءَ زوتءُ راستیں مولءُ مراد ءَ اوگانستان ءَ داعش، القاعدہ ءُ آئیءِ کمک کارانی ھلاس کنگءِ ھاترءَ ترندءُ مھکمیں گامیگج کنگ بہ بنت۔ مزن وزیر شاہد خاقان عباسی ءَ گشتگ کہ پاکستانءِ ناشرکاری کاریءِ ھلاپ ءِ جنگءِ سرءَ کس جُست چست کُت نہ کنت۔ آئیءَ گشتگ کہ نائن الیون ءَ پد پاکستانءِ کوشستاں چہ القاعدہ ھلاس کنگ بوت۔ آئیءَ گشتگ کہ پاکستانءَ فوجی آپریشن آناں چہ کوھستانی دمگاں دراھیں ناشرکار انی گل ھلاس کتگ اَنت۔ آئیءَ گشتگ کہ پاکستان ءَ ناشرکاری ءِ ھلاپءَ مزنیں نیادے ادا کتگ ۔ 6500فوجی ءُ کانود نافذ کنوکیں اہلکارآں ھوار 27ہزار پاکستانی اے جنگءَ شہید بوتگ اَنت۔ مزن وزیر ءَ ناشرکاری ءِ میاں اوستمانی جیڑھ ءَ را گرءُ دار کنگءِ ضلورتءِ سرءَ زور پِر داتگءُ ناشرکاری ءِ گرءُ داری میاں اوستمانی حکمت عملی ءِ تہا ھاسیں کمی ءِ گپ کتگ کہ ایشی ءِ سوبءَ چہ اے جیڑھ ءَ را گرءُ دار کنگءَ سوبمند نہ بوتگ اَنت۔ آئی ءَ ناشرکاری ءِ بنکی سوب آں گرءُ دار کنگ ءِ ضلورت ءِ سرءَ زور پِرداتگءُ گشتگ کہ ناشرکاری ءِ بنیات تنا نیزگاری ءُ جہالت نہ اِنت۔ مزن وزیر ءَ گشتگ کہ ناشرکاری ءِ سوب آنی تہا ناانصافی، زُلمءُ ناھکی ءُ درملکی دست مان بوھگءَ ھوار سیاسی ءُ دومی زھباری ءِ سرءَ ردعمل ھم اَست۔ آئیءَ گشتگ کہ اے سوب آں ھلاس کنگءَ ابید ناشرکارءُ آھانی گلانی ھلاس کنگ گران بیت۔
