کنٹرول لائن ءِ سرءَ کجام وڈیں مہم کنگءُ پاکستانءِ ھلاپ ءَ محدودیں جنگ ءِ ڈاکٹرین ءِ سرءَ عمل کنگءَ بھارتءَ را برابری ءِ پسو دیئگ بیت
اقوام متحدہ۔22ستمبر(اے پی پی) اقوام متحدہ ءِ جنرل اسمبلی ءَ گوں تران کنانءَ مزن وزیر شاہد خاقان عباسی ءَ لوٹ کتگ کہ میاں اوستمانی ادارگ کشمیرءِ سرءَ وتی تپاک نامہءِ عملدرآمدکنگءَ وتی زمہ واریاں پیلو بہ کنتءُ اے ھوالگءَ اقوام متحدہ ءِ سیکرٹری جنرل کشمیر ءِ سرءَ ھاسیں نمائند گ بہ دار یت کہ سلامتی کونسل ءِ دیرگیں تپاک نامہ ءِ سرءَ عملدرآمد بہ کنت۔ اقوام متحدہ ءِ سیکرٹری جنرل ءُ بنی آدم ءِ ھکانی ہائی کمشنر بھارت ءِ پنجگانی چیر کشمیر ءَ بنی آدمءِ ھکانی ھلاپ ورزیانی ھوالگءَ معلوم داربوھگ ءُ ایشی ءِ زمہ واراناں سزا دیئگءُ آماچیں مردماناں انصاف ءُ ریلیف پھجارینگءِ ھاترءَ انکوائری کمیشن دیم بہ دنت۔ آئیءَ گشتگ کہ پاکستان میاں اوستمانی براتی ءِ سرءَ زور پِردنت کہ آ مقبوضہ کشمیرءَ اُلسءِ سرءَ زُلمءُ نہ ھکی ءَ را بہ دار ایت۔ ریاستی پالیسی ءِ ردءَ زالبولاناں بے شرپ کنگ بند کنگ بہ بیت۔ھال در ءِ بلیک آؤٹ ھلاس کنگ بہ بیت۔ مقبوضہ کشمیر ءَ ڈریکو نین ہنگانی کانود ھلاس کنگ بہ بنت ءُ دراھیں کشمیری سیاسی قیادت رہا کنگ بہ بنت۔ مزن وزیر ءَ گشتگ کہ بھارت مقبوضہ کشمیر ءَ وتی زُلم ءُ نہ ھکی ءَ چہ دنیاءِ دلگوشی ءَ دگہ نیمگے ءَ کنگءِ ھاترءَ کشمیر ءَ لائن آف کنٹرول ءِ سرءَ تیرگواری بندیءِ یکوئیءَ ھلاپ ورزی ءَ کنگءَ اِنت۔ آئیءَ گشتگ کہ گوازوکیں سال جنوری ءَ تاں انوں بھارتءَ فائر بندی ءِ 600ورزی کتگ۔ پاکستان ءَ اے جاورھال ءِ سرءَ تمبل پیش داشتگ۔ بلے اگاں لائن کنٹرول ءِ سرءَ بھارت کجام وڈیں مہم کنگءِ کوشست کنت گڈا آ برابر ءُ ترندیں پسو دیئگ بیت۔ مزن وزیر شاہد خاقان عباسی ءَ گشتگ کہ میاں اوستمانی براتی ءَ را جاورھال ءَ را ھراب ءَ چہ رکھینگءِ ھاترءَ پیسلہ کنگءُ کرد پیلو کنگ لوٹ ایت۔ آئیءَ گشتگ کہ کشمیرءِ جیڑھ ءِ گیشءُ گیواری ءُ امنءُ ایمنی ءِ ھاترءَ گامیگج کنگ لوٹ ایت۔ آئی ءَ گشتگ کہ بھارت پاکستان ءِ گوما امنءُ ایمنی کنگءَ ساڑی نہ اِنت۔ مہ سلامتی کونسل ءِ سرءَ زور پِر دیان کہ آ جموں ءُ کشمیر ءِ سرءَ وتی تپاک نامہ آنی سرءَ وتی زمہ واری ءَ پیلوءَ بہ کنت۔ اے ھوالگءَ اقوام متحدہ ءِ سیکرٹری جنرل کشمیر ءِ سرءَ ھاسیں نمائندگ بہ داریت کہ سلامتی کونسل ءِ دیریگیں تپاک نامہ ءِ سرءَ عمل درآمد کنگءِ سرءَ زوربہ دنت۔
