حکومت گونڈئُ وخت اسے ٹی ایل این جی نا دروشم اٹ توانائی نا ہڑزان ذریعہ ئِ درستی راستی کرفے، پورٹ قاسم آ ایل این جی ٹرمینل نا بناء330 دے انا ریکارڈ مداٹی پورو مس
کراچی۔ 27 اگست (اے پی پی) وزیراعظم شاہد خاقان عباسی پارینے کہ ساڑی حکومت بھاز گونڈ ئُ وخت اسے ٹی ایل این جی نا دروشم اٹی توانائی نا ہڑزان ئُ ذریعہ اسے درستی راستی کرفے، پورٹ قاسم آ ایل این جی ٹرمینل 330 دے انا ریکارڈ مداٹی پورو مسنے، ریکارڈ مداٹی ڈٹ آتے پورو کننگ ساڑی حکومت نا امتیازی وصف اسے ہرانابنداوی مسخت الس ئِ زیات آن زیات آسراتی تا فراوانی ئِ المی جوڑ کننگ نا ئِ ، این این جی نا درآمد آن قومی معیشت ئِ سالانہ 1.5ارب ڈالر نا فائدہ رسینگک وخت اس کہ کبین انگا فرنس آئل آن بیدس ہڑزان ایل این جی نا کاریم اٹ اتنگ آن زرمبادلہ نا بچت مریک۔ وزیراعظم داخیال آتا درشانی ئِ یک شنبے نادے داڑے پورٹ قاسم آ ایل این جی ٹرمینل نا بنائی دود آن تران کرسا کرے۔ داٹرمینل اینگرو ٹرمینل لمیٹڈ 330 دے انا ریکارڈ مد اٹی پورو کرینے ہرا 600 ایم ایم ایس سی ایف بی گیس انا ری کیسیفیکیفشن نا کچ انا حامل ئِ ۔ داڑآن نئے بیرہ صنعتی ادارہ توانائی نا تینا گرج آتے پورو کننگ کیک بلکن الس ئِ ہم ریلیف ملک و تیل آن کبین بجلی ودی کننگ آ سیبو ٹی کمتی مریک ۔ دود آن تران کرسا وزیراعظم شاہد خاقان عباسی پارے کہ ساڑی حکومت توانائی نا داہڑزان انگا ذریعہ ئِ 14تُو انا کم وخت اٹی ملک اٹی درستی راستی کرفینے، مستین نا مسہ حکومت آک پاکستان اٹی ایل این جی اتنگ کن کیہی کوشست آتے کریر ولے اوفتے سرسہبی ملتو۔ وزیراعظم پارے کہ ملک اٹی توانائی نا ودوک آ گرج آتے پورو کننگ کن ایل این جی اسہ ہڑزآن ئُ ذریعہ اسے انتئے کہ تیل و جوہری ذریعہ غان توانائی نا پیداوار نا عمل کبین ئِ۔ وزیراعظم پارے کہ ایل این جی کن بولی نا عمل شفاف وڑاٹ پورو مس ہرادے امنا جہانی برادری ہم کرینے، جہانی وڑاٹ داخیال خننگاکہ کہ پاکستان اٹی ایل این جی ئِ اتنگ اٹی کیہی سال لگنگ کیک ولے ساڑی حکومت ئِ دااعزاز دوئی ئِ کہ او بھاز گونڈ ئُ وخت اسے ٹی ایل این جی نا دروشم اٹی توانائی نا داذریعہ ئِ درستی راستی کرفے۔ وزیراعظم پارے کہ پورٹ قاسم آ ایل این جی ٹرمینل نا بناء330 دے انا ریکارڈ مد اٹی پورو مسنے، ریکارڈ مد اٹی ڈٹ آتے پورو کننگ ساڑی حکومت نا امتیازی وصف اسے ہرانا بنداوی مسخت الس ئِ زیات آن زیات آسراتی تا فراوانی ئِ المی جوڑ کننگ نا ئِ۔ وزیراعظم پارے کہ اوڑکن داڑے ساڑی گری خوشی نا ہیت اسے ، توانائی نا اہمیت مسلمہ ئِ ، توانائی نا کمتی نا سوب ملک ئِ مشکل آتون مون تروئی مننگ کریکہ۔ وزیراعظم پارے کہ حکومت تیل انا ترسیل و کاریم اٹ اتنگ ئِ آسان جوڑ کننگ خواہک ولے داڑآ خڑچ آک بھاز زیات ئُ و اوفتا ایسری ایل این جی نا دروشم اٹی توانائی نا فراوانی نا دروشم اٹی ساڑی ئِ، مستین اٹی ملک اٹی ایل این جی اتنگ نا چندی کوشست آتے کننگا ولے بے سہب مسر ہرانا چندی سوب آک ئُ ، مستین اٹی ٹرمینل آتا جوڑ جاڑ آن بیدس ایل این جی اتنگ نا کوشست کننگا۔ وزیراعظم پارے کہ حکومت نجی بشخ انا کمکاری آن ایل این جی ٹرمینل جوڑ جاڑ کرینے۔ اوپارے کہ توانائی نا بابت ویل آتا ایسری ساڑی حکومت نا اولیت آتیٹی اوار مسنے ، وزیراعظم پارے کہ معاہدہ غا دستخط آن پد ایل این جی ٹرمینل نا جوڑ جاڑ نا عمل یانزدہ تُو انا ریکارڈ مد اٹی پورو کننگا۔ وزیراعظم پارے کہ ٹرمینل نا جوڑ جاڑ اٹی حکومت تون اوار اوار چندی ادارہ غاک کمک کریر، ٹرمینل نا جوڑ جاڑ کن اِراپارٹی بولی نا عمل اٹی بشخ ہلکر و دامچ آ عمل بے کچ شفاف وڑاٹ ایسری اسکان سرکننگا۔ مچ آدنیا ٹی داخہ کم مد اٹی ہچ ئُ ٹرمینل اس پورو کننگ تنے۔ وزیراعظم پارے کہ ملک اٹی ایل این جی نا درآمدآن پد توانائی نا بابت ویل آتے کم کننگ اٹی کمک رسینگانے ، گیس انا کمتی نا سوب سی این جی نا بشخ آ زئم تماسس ولے ایل این جی نا درآمد آن پد نئے بیرہ سی این جی نا بشخ ئِ گیس انا فراوانی ٹی کمک ملانے بلکن صنعت خاص کر کھد سازی نا صنعت ئِ بلاتعطل گیس فراوان کننگ انگ ئِ وخت اس کہ بجلی نا پیداوار نا بشخ آ ہم بے کچ جوان ئُ زئم اس تمنگ ئِ ۔ این این جی نا درآمد آن قومی معیشت ئِ سالانہ 1.5 ارب ڈالر نا فائدہ رسینگک ۔ وزیراعظم پارے کہ داوخت اسکان ایل این جی نا سد جہاز بسنو ہرافتیا درآمدی ایل این جی نا کچ 6.1ملین ٹن ئس، ایل این جی نا درآمد آن بجلی ، کھد سازی، ٹیکسٹائل و ایلو صنعت آتے آر ایل این جی نا فراوانی ٹی کمک ملنگ ئِ۔ اوپارے کہ 600 ملین ایم ایم سی ایف ڈی آر ایل این جی نا فراوانی آن اینگروٹرمینل ملک اٹی گیس انا فراوانی نا بھلو ذریعہ اس جوڑ مسنے۔اوپارے کہ ارٹ میکو ایل این جی ٹرمینل نومبر اٹی کاریم نا بنائِ کیک وخت اس کہ نجی بشخ انا کمک اٹ پین مسہ ایل این جی ٹرمینل جوڑ کننگک، توانائی تنکی نا تناظر اٹی دابشخ اٹی نجی بشخ ئِ اوار مننگ خوش آئند ئِ۔ شاہد خاقان عباسی ایل این جی ٹرمینل نا بنانا ستائِ کرسا دایخین نا درشانی ئِ کرے کہ ملک اٹی توانائی نا ویل آتا زوت اسے اٹ مون ئِ توننگک۔
