اسلام آباد۔ 07 اگست (اے پی پی) پاکستان پارینے کہ 7 جولائی 2017ءآ نیویارک اٹی وونٹ انا کمک اٹ اختیار کروک آ جوہری سلہہ غاتا ممانعت نا معاہدہ ٹی المی شرط آتے پورو کننگ تنے۔ پاکستان ایلو غٹ جوہری ملک آتیامبار دامذاکرات اٹی بشخ التوو او دامعاہدہ نا باسک جوڑ مننگ کپک۔ہنداخاطران دا معاہدہ نا رداٹ تینے ہچ ئُ وڑاسے نازمواری تا پابند سمجھپک ۔ دوشنبے نادے دفترخارجہ آن جاری اسہ بیان اسے ٹی پاننگانے کہ پاکستان جوہری سلہہ غاتیا عالمگیر، قابل تصدیق وغیر امتیازی جامع کنونشن نا پوروی نا کمک اٹ جوہری سلہہ غاتیان پاک دنیا نا مسخت کن پرعزم ئِ۔ جینوا ٹی تخفیف سلہہ غاتا بارواٹی کانفرنس داوڑنا کنونشن نا پوروی کن غٹ آن زیات مثالی ئُ فورم اسے۔ اقوام متحدہ نا جنرل اسمبلی نا 1978ءٹی جوہری سلہہ غاتا تخفیف نا بابت مہالو خاص ئُ دیوان اسے ٹی اتفاق رائے اٹ داہیت انا منظوری ئِ تننگاسس کہ تخفیف سلہہ غاتے کن گام گیج اختیار کرسا ہر ملک انا سیکورٹی نا حق ئِ بایدے ذہن اٹ تخوئی مرے و داعمل نا ہرمرحلہ غا غٹ ریاست آتے کن بلاتخفیف سیکورٹی دانا مسخت مریک۔ پاکستان سمجھک کہ دا اہم انگا مسخت غٹ شریدار آتا اوارمننگ آن اتفاق رائے نا کمک اٹ بیرہ جہانی کمکاری آن دوئی کننگ مریک۔ بیان اٹی پاننگانے کہ جوہری سلہہ غاتا تخفیف نا بابت ہرگام اکن ہر ریاست نا المی سیکورٹی ئِ مون آ تخنگ المی ئِ۔ پاکستان پارینے کہ 7 جولائی 2017ءآ نیویارک اٹی اسہ وونٹ اسے نا کمک اٹ اختیار کروک آ جوہری سلہہ غاتیا پابندی نا معاہدہ ٹی او المی شرط آتے، عمل و مواد ہڑتوم آ لحاظآن، پورو کننگ تنو۔ ہرامعاہدہ غاتیٹی غٹ شریدار آتا مفاد آتے پوروی وڑاٹ مون آ تخنگپک او تینا مسخت آتا دوئی ٹی بے سہب مریرہ۔ پاکستان ایلو غٹ جوہری ملک آتیامبار دامذاکرات اٹی بشخ التو و او دامعاہدہ نا باسک جوڑ مننگ کپک۔ پاکستان داہیت آ ہم زورشاغاکہ دامعاہدہ ہرلحاظ آن روایتی جہانی کانود نا بشخ و نئے دانا تیاری ٹی اونا کڑد اسے۔ پاکستان جوہری سلہہ غاتا داوڑاٹ تخفیف نا بابت تینا عزم انا اعادہ ئِ کیک ہراڑآن علاقائی و جہانی کہول آ امن ، سلامتی و سوگوی ئِ مون آ دننگے۔
