اسلام آباد۔13جون (اے پی پی): ایوان بالا ءَ یک قراردادے ءِ تپاکی ءَ منظور کتگ کہ ایشی ءِ تہ ءَ ایران ءِ سر ءَ اسرائیل ءِ اُرش ءِ سک مذمت کنگ بوتگ ءُ ایران ءِ گوما یکوئی ءِ درشان کنگ بوتگ۔ نائب مزن وزیر ءُ دری کارانی وزیر سینیٹر اسحاق ڈار ءَ جمعہ ءِ روچ ءَ ایوان بالا ءِ دیوان ءَ اے قرارداد پیش کتگ۔ قرارداد ءِ تہا گشگ بوتگ کہ مرچی سھب ءِ وھد ءَ ایران ءِ سر ءَ اُرش سک باز افسوسناکیں ءُ مذمت ءِ لائک اِنت۔ اسرائیل ءَ ایران ءِ سرا اُرش کنان ءَ اقوام متحدہ ءِ منشور ءُ میان استمانی کانود ءِ ھلاپ ورزی کتگ۔ اسرائیل ءِ اے کار جنگی جرم اِنت ءُ دمگ ءِ امن ءَ را ھترناک کتگ۔ قرارداد ءِ تہا گشگ بوتگ کہ اسرائیل مقبوضہ فلسطین ءُ اے دگہ مسلمانیں ملکانی تہا ظلم کنگ ءَ انت، غزہ ءَ زہگ شہید کنگ بوہگ ءَ انت ءُ فلسطینی نسل کشی کنگ بوہگ ءَ انت۔ قرارداد ءِ تہ ءَ گیش گْوشگ بیتگ کہ اے ایوان یک رند ءَ اسرائیل ءِ مسلمان امت ءِ سر ءَ ھاسیں رنگ ءَ ایران ءُ فلسطین ءِ سر ءَ زوراکی ءِ مذمت کنت ءُ وتی مسلمانیں برات ءُ گہارانی ھمراھی ءَ اوشتاتگ۔ ایشی ءَ چہ پد سینیٹ ءِ چیئرمین سید یوسف رضا گیلانی ءَ ایوان ءَ چہ قرارداد ءِ منظوری ءِ لوٹ کتگ۔ ایوان ءَ تپاکی ءَ گوں قرارداد منظور کتگ۔ ایشی ءَ چہ پیسر نائب مزن وزیر ءُ درئی کارانی وزیر سینیٹر اسحاق ڈار ءَ ایوان ءَ سرپد کت کہ وزارت ءِ درئی کار ءَ یک بیانے جاڑی کنان ءَ ایران ءِ سر ءَ اسرائیل ءِ ارش ءِ مذمت کتگ ۔ آئی ءَ ایوان ءَ وزارت ءِ درئی کار ءِ اے بیان ھم ونت۔
