چینی تجارتی مشیر ءَ وفاقی جان سلامتی ءِ وزیر ءَ گوں گند ءُ نند کتگ، پاک چین بزنس ٹو بزنس فارما سیوٹیکل کانفرنس  ءِ بابت ءَ گپ ءُ تران

اسلام آباد۔8جولائی  (اے پی پی): وفاقی وزیر جان سلامتی مصطفیٰ کمال ءَ گوں چینی سفارتخانہ ءِ کمرشل کونسلر ءَ گند ءُ نند کت ایشی ءِ تہ ءَ 16جولائی ءَ چہ 19جولائی ءَ کراچی ءَ برجم دارگ بوھوکیں پاک چین بزنس ٹو بزنس فارما سیوٹیکل کانفرنس  ءِ تیاری ءُ وت مہ وتی کمک ءِ جتا جتائیں تک آنی سر ءَ گپ ءُ تران کنگ بوت۔ وزیر ءِ جان سلامتی ءَ گوشت کہ پاکستان چین ءِ بزنس ٹو بزنس فارماسیوٹیکل کانفرنس دوئیں ملک آنی نیام ءَ جان سلامتی ءِ شوبگ ءَ کمک ءَ را گیش مھکم کنگ ءِ واستہ یک ھاسیں گامگیج ءِ ثابت بیت۔ آئی ءَ سیادی داروکیں ادارگ آنی نیام ءَ فعال کمک، جوانیں ھمگرنچی ءُ سرجمیں تیاری ءِ ضلورت ءِ سر ءَ زور پر دات تانکہ کانفرنس ءِ آسر گیش ءَ چہ گیش موثر بہ بنت۔ مصطفیٰ کمال ءَ گوشت کہ کانفرنس ءَ چہ دوائی آنی شوبگ ءَ سرمایہ کاری، ٹیکنالوجی ءِ ٹرانسفر ءُ یکجائی منصوبگ ءُ شریکداری ءِ واستہ نوکیں موہ رس ایت، ایشی ءَ چہ پاکستان ءِ بنجاہی دوائی آنی صنعت ءَ را ھم دیمروئی رسیت۔ آئی ءَ گوشت کہ کانفرنس ءِ تہ ءَ پاکستان ءُ چین ءَ چہ نامداریں فارماسیوٹیکل، میڈیکل ڈیوائس ءُ چین ءِ روایتی دوائی کمپنی آنی سروک بھر زوری کن اَنت ایشی ءَ ابید سرکاری ادارگ ریگولیٹری اتھارٹیز، صنعت ءُ جندی شوبگ ءِ نمائندہ ھم کانفرنس ءِ تہ ءَ بھر زور اَنت۔ وفاقی وزیر جان سلامتی ءَ وتی جزم ءِ درشانی کت کہ پاکستان ءِ حکومت چین ءِ گوما وتی اسٹریٹجک کمک ءَ را گیش گیش ءُ گیوار کنت تانکہ دمگی دوا ءُ درمان ءِ صنعت ءَ را دیمروئی بہ دنت، نوکیں طبی ٹیکنالوجی ءِ گرگ ءُ معیاری جان سلامتی ءِ آسراتی ءَ را الس ءِ رسائی ءَ را گہتر بہ کنت۔