پاکستان ءِ اقتصادی اصلاحات ءُ مالیاتی استحکام ءِ سر ءَ جھان ءِ بھروسہ مھکم اِنت، ملک ءِ اقتصادی کارکردگی ءِ تہ ءَ مدام گہتری بوھگ ءَ اِنت، سینیٹر محمد اورنگزیب

اسلام آباد۔8جولائی  (اے پی پی): وفاقی وزیر خزانہ سینیٹر محمد اورنگزیب ءَ گوشت کہ پاکستان ءِ اقتصادی اصلاحات ءُ مالیاتی استحکام ءِ سر ءَ جھان ءِ بھروسہ گیش مھکم بوتگ، ءُ اقتصادی اصلاحات ءُ موثر اقتصادی پالیشی آنی سبب ءَ ملک ءِ اقتصادی کارکردگی ءَ را مدام گہتری آرگ بوھگ ءَ اِنت۔ آئی ءَ اے ھیالانی درشانی ایس اینڈ پی گلوبل ریٹنگز ءِ ڈل ءَ گوں گند ءُ نند ءِ ساھت ءَ کت، ایشی ءِ تہ ءَ ملک ءِ اقتصادی جاور ھال، کریڈٹ پروفائل ءُ اصلاحات ءِ ایجنڈا ءِ سر ءَ گپ ءُ تران کنگ بوت۔ ایس اینڈ پی گلوبل ریٹنگز ءَ پاکستان ءِ اقتصادی اصلاحات، مالیاتی نظم ءُ ضبط، قرضہ ءِ برجائی ءُ اقتصادی استحکام ءِ ھاتر ءَ حکومت ءِ جزم ءِ توسیپ کتگ۔ وزیر خزانہ ءَ ڈل ءَ را گوشت کہ مالی سال 2026-27ءِ بجٹ ءِ چیر دستی ءَ پاکستان ءِ اقتصادی بنیات آنی تہ ءَ مزنیں گہتری اتکگ۔ آئی ءَ اقتصادی استحکام ءِ مستریں سبب کمیں افراط زر، زرّ ءِ ذخائر ءِ تہ ءَ گیشی، مھکمیں درملکی شوبگ ءُ سرمایہ کار آنی اعتماد ءِ تہ ءَ گیشی لیک اِتگ۔ آئی ءَ گوشت کہ مالیاتی خسارہ ءِ کمی، ریکارڈ پرائمری سرپلس ءُ وام آنی گہتری ءِ وسیلگ ءَ مالیاتی برجائی ءَ را گیش مھکم کنگ بوتگ۔ ڈل ءَ را ٹیکس، توانائی، سرکاری ادارگ، نجکاری، گورننس ءُ مالیاتی انتظامی ءِ تہ ءَ جاری اصلاحات آنی ھوالگ ءَ سرپد کنگ بوت۔ وزیر خزانہ ءَ گوشت کہ برجاھیں اقتصادی اصلاحات ءُ مالیاتی نظم و ضبط پاکستان ءِ معیشت ءُ جھان ءِ اعتماد ءِ دوئیں تک ءَ را مھکم کنگ ءَ انت۔