اسلام آباد۔ 13جون (اے پی پی) پاکستان اسلامی جمہوریہ ایران نا برخلاف اسرائیلی نا بلاجواز و ناروا جارحیت نا ترندی اٹ مذمت ءِ کرینے۔ ترجمان دفترخارجہ نا کنڈآن جمعہ نادے آ جاری بیان اٹی پاننگانے کہ اسرائیلی فوجی جلہو اسلامی جمہوریہ ایران نا وتواجہی و علاقائی سالمیت نا خلاف ورزی و اقوام متحدہ نا چارٹر و جہانی کانود نا بنداوی اصول آتا اسُل خلاف ورزی ءِ۔ اقوام متحدہ نا چارٹر نا آرٹیکل51نا رداٹ ایران ءِ تینا دفاع نا حق دوئی ءِ۔ ترجمان پارے کہ پاکستان ایرانی الس تون سنبرینگوک یکجہتی تون سلوک ءِ و پیدوار وڑاٹ دا اشتعال انگیزی نا مذمت ءِ کیک ہرا مچ آ ڈیہہ و اوڑآن پیشن نا امن، سلامتی و سوگوی کن اسہ بھلو خطرہ اسے و سنگین مضمرآتا حامل ءِ۔ بیان اٹی مستی پاننگانے کہ جہانی برادری و اقوام متحدہ نا زمواری ءِ کہ او جہانی کانود نا پاسداری ءِ پک کرسا دا جارحیت ءِ دمدستی وڑاٹ توریرجارح ءِ اونا کارروائی تا جوابدہ گوندفر۔
