اسلام آباد۔ 12جون (اے پی پی) اسپیکر قومی اسمبلی سردار ایاز صادق پارینے کہ چناک قوم انا آخبت ءُ اوفتے جبری مشقت آن بچفنگ ننا غٹ انا اسیجائی زمواری ءِ، چناتتون مشقت سنگین راجی ویل و ڈوہ اسے، چائلڈ لیبر چناتا رکھ و روشنا آخبت نا کسر اٹی بھلو اڑاند اسے۔ داخیال آتا درشانی ءِ او جہانی چائلڈ لیبرڈے انا وخت آ تینا کلہو اٹی کرے۔ اوپارے کہ آئین ءِ پاکستان چناتا رکھ و اوفتا گچین زند انا آب انا ضمانت ایتک، ہرچناتعلیم، رکھ، گوازی و جان جوڑ نشوونما نا حق تخک۔ اوپارے کہ چناتے رکھوک و مشقت آن پاک چاگڑد اس فراوان کننگ ننا غٹ انا اسیجائی زمواری ءِ، پارلیمان چناتا حق انا رکھ اکن سنبرینگوک ءِ و دا چناتا حق انا رکھ و اوفتے مشقت آن بچفنگ کن گچین کانود سازی کرینے۔ اونا پاننگ ئس کہ چناتا حق انا رکھ اکن قومی اسمبلی ٹی ’’پارلیمانی کاکس آن چائلڈ رائٹس‘‘ ءِ جوڑ کننگانے ہرااوفتا حق انا رکھ اکن فعال کڑد ادا کننگ ءِ۔ اسپیکر پارے کہ چائلڈ لیبر نا چٹفنگ کن میڈیا، سول سوسائٹی و الس ءِ اواری اٹ کاریم کننگ نا گرج ءِ، ملک اٹی اسکول آن پیشن چناتے اسکول آتیٹی اتنگ کن پارلیمانی کاکس چائلڈ رائٹس خصوصی رپورٹ اس مرتب کرینے۔
