اسلام آباد۔22مئی (اے پی پی):کاسمیٹکس ءِ صنعت ءِ نمائندگی کنوکیں ڈل ءَ سائنس ءُ ٹیکنالوجی ءِ وفاقی وزیر خالد حسین مگسی ءَ گوں گند ءُ نند کت، ایشی ءِ تہ ءَ راجی تک ءَ صنعت ءِ دیم ءَ اوشتاتگیں جیڈھ، چیلنج ءُ موہ آنی سر ءَ سرجمیں رنگ ءَ گپ ءُ تران کنگ بوت۔ وزارت سائنس ءُ ٹیکنالوجی ءِ نیمگ ءَ چہ جاڑی بوتگیں بیان ءِ رد ءَ ڈل ءَ گوشت کہ معیار ءِ کمی، سستیں ٹیسٹنگ سسٹم، ءُ برآمدات ءِ دیم ءَ رکاوٹ اے شوبگ ءِ دیمروئی ءِ تہ ءَ مزنیں رکاوٹ اَنت۔ خالد حسین مگسی ءَ دل یکیمی دات کہ حکومت صنعت ءِ دیمروئی ءِ واستہ ہر ممکن کمک ءَ کنت تانکہ دمگی پیداوار ءَ را جہانی مارکیٹ ءَ جوانیں رنگ ءَ دیم ءَ آرگ بہ بیت۔ آئی ءَ گوشت کہ صارف آناں کوالٹی ءِ چیز آنی پھجارینگ ءِ واستہ یک یکجاھیں ءُ آسانیں ”یک ونڈو“ ءِ کوالٹی ءِ یقین دہانی ءِ نظام ءِ بندات کنگ بیت، وھدیکہ انسانی ورگ ءِ واستہ درستیں چیز آنی سخت ءُ جامع ٹیسٹنگ ءَ را دل یکیمی کنگ بیت۔ وفاقی وزیر ءَ گوشت کہ حکومت نہ ایوک ءَ معیار ءَ را میاں اوستمانی تک ءَ سر کنت بلکینگ ءَ برآمدات ءَ را دیمروئی دیگ ءِ واستہ عملی گامگیج ھم چست کنت۔ آئی ءَ گوشت کہ پاکستانی کاسمیٹکس پروڈکٹس ءِ تہ ءَ مزنیں گنجائش است انت کہ ایشی ءَ را گہتریں پالیشی، کمک ءُ نگرانی ءِ وسیلگ ءَ جھان ءِ تک ءَ دیم ءَ آرگ بوت کنت۔ وزارت سائنس ءُ ٹیکنالوجی اے درگت ءَ پالیسی سازی، پٹ ءُ پول ءُ دیمروئی ءُ صنعت ءِ گوما سیادی ءَ را گیش مھکم کنت۔
