اسلام آباد۔22مئی (اے پی پی):پاکستان ءُ افریقہ ءِ ملک آنی نیام ءَ دوستی ءُ کمک ءِ دیمروئی ءِ واستہ پاکستان ءِ سینیٹ ءَ یک ھاسیں مراگشے برجم دارگ بوت ایشی ءِ تہ ءَ افریقہ ءِ جتا جتائیں ملک آنی سفیر ءُ ہائی کمشنر آناں بھر زرت۔ اے مراگش ”پاکستان ءُ افریقہ ءِ دوستی ءِ روچ“ ءِ درگت ءَ برجم دارگ بوتگ۔ دیوان ءَ چیئرمین سینیٹ سید یوسف رضا گیلانی ءِ سروکی ءَ یک راجدپتری قرارداد ءِ منظوری دیگ بیت ۔ قرارداد ءِ تہا پاکستان ءِ حکومت ءَ چہ لوٹ کنگ بیت کہ آ ہر سال 25 مئی ءَ پاکستان ءُ افریقہ دوستی ءِ روچ ءِ برجم دارگ ءِ باقاعدہ جار ءَ بہ جنت، تانکہ دو نیمگی، کثیر نیمگی ءُ میاں اوستمانی تک ءَ سیادی ءَ را گیش دیمروئی دیگ بہ بیت۔ اے موہ ءِ سر ءَ افریقی سفارتکار آناں ھم ایوان بالا ءِ کاروائی آنی چارگ ءِ موہ دیگ بوتگ وھدیکہ آوانی شرپ ءَ ھاسیں استقبالیہ ءِ ھم برجم دارگ بوتگ۔ سینیٹ سیکرٹریٹ ءَ اے مراگش ءِ ھاتر ءَ سرجمیں بندوبست کتگ۔ سینیٹ ءِ چیئرمین سید یوسف رضا گیلانی ءَ افریقہ ءِ براعظم ءِ گوما کثیر نیمگی ءُ برجمیں کمک ءِ ارزشت ءِ سر ءَ زور پر دیان ءَ گوشت کہ پاکستان افریقی ملک آنی گوما سیادی ءَ را نوکیں کونڈ آنی تہ ءَ سر کنگ ءِ واھشت مند اِنت۔
