کوئٹہ۔ 24 اپریل(اے پی پی) وزیراعلیٰ بلوچستان میر سرفرازبگٹی نا کماشی ٹی محکمہ زکواۃ نا تنظیم نو و اصلاحات نا بابت بڑزکو کہول انا دیوان چیف منسٹر سیکرٹریٹ اٹی اڈتننگا۔ ہراٹی حقدار اسکان مالی امداد شفاف و وخت آ سرکننگ کن جوان ءُ میکنزم اسے آ سجفنگا۔ دیوان اٹی فیصلہ کننگا کہ چیف سیکرٹری بلوچستان نا کماشی ٹی اسہ جوان ءُ پلان اس مرتب کننگک ہراٹی محکمہ زکواۃ نا تنظیم نو، اصلاحات و گچین حکمت عملی نا خدوخال اوار مریک۔ داوخت آ وزیراعلیٰ میر سرفراز بگٹی پیدوار پارت کرساپارے کہ اصلاحاتی عمل اٹی محکمہ زکواۃ نا ملازم اسے بے روزگار کننگپک، البتہ دوئی افرادی قوت ءِ گچین وڑاٹ یوٹیلائزکننگک، نن ہندن ءُ نظام اس خوانہ ہرانا رداٹ زکواۃ نا زر ءِ براہ راست اسٹیٹ بینک آن جاری مرسا حقدار بندغ نا جندی اکاؤنٹ اٹی منتقل مرے تانکہ کرپشن، کمیشن و دفتری اڑاند آتیان پاک اسہ شفاف نظام اس جوڑمرے۔ وزیراعلیٰ زکواۃ نا فراوانی ٹی تاخیر آ ترندی نا درشانی ءِ کرساپارے کہ کیہی سال آن حقدار بندغ آتا اسہ کچ اس زکواۃ آن محروم ءُ ہراکہ گڑتی نا ہیت اسے۔ اوپارت کرے کہ پیچیدہ دفتری عمل نا جاگہ غا اسہ سمارٹ و ڈیجیٹل نظام اسے نا کمک اٹ دمدستی و براہ راست امداد ءِ پک کننگے۔ دیوان اٹی فیصلہ کننگاکہ اسہ تُو انا تہہ ٹی جوان سلاہ و سوج مرتب کرسا منظوری کن پیش کننگک۔ داوخت آ وزیراعلیٰ محکمہ زکواۃ نا ڈیجیٹلائزیشن آ زور شاغسا پارے کہ بلوچستان اٹی زکواۃ بشخنگ نا عمل اٹی شفافیت اتنگ کن پوسکن آ ٹیکنالوجی نا کاریم اٹ اتنگ وخت انا اہم گرج جوڑمسنے، دیوان اٹی پارلیمانی سیکرٹری مذہبی امور، زکواۃ اوقاف گودی شہناز صادق عمرانی، چیف سیکرٹری بلوچستان شکیل قادر خان، پرنسپل سیکرٹری ٹو چیف منسٹر بابر خان، سیکرٹری زکواۃ مذہبی امور محمد اسحاق جمالی و ایلو تعلقدار کمامدارآک بشخ ہلکر۔
