27 ارب روپئی آن پورو مروک آ ڈٹ اٹی 8.5 کلومیٹر و 1.9 کلومیٹر نا اِرا سرنگ، 35کلومیٹر رابطہ روڈ، 12پول اوار ئُ
ڈٹ انا پوروی آن چترالی الس نا ملک انا ایلو بشخ آتون ڈغاری رابطہ 5تُو آن بیدس مچ آ سال بحال مریک
اپردیر۔ 20 جولائی (اے پی پی) وزیراعظم محمد نواز شریف پنچ شمبے نا دے 8.5کلومیٹر مریس لواری ٹنل نا باضابط وڑاٹ بنائِ کرے، ٹنل نا پوروی آن چترال نا الس ئِ گچین سفری آسراتی دوبریک، وزیراعظم ٹنل نا پترینگوک آ کسر آ فیتہ ئِ کاٹ کرسا داتاریخی ڈٹ انا بنائِ کرے۔ داوخت آ وزیراعظم تون اوار گورنر خیبر پختونخوا اقبال ظفرجھگڑا، وزیراعظم نا سلاہکار و پاکستان مسلم لیگ (ن) نا صوبائی صدر امیر مقام، ڈپٹی اسپیکر قومی اسمبلی و صوبائی جنرل سیکرٹری پاکستان مسلم لیگ (ن) مرتضیٰ جاوید عباسی و وزیراعظم نا سلاہکار سول ایوی ایشن سردار مہتاب احمد عباسی، مسلم لیگ (ن) نا راہشون پیر صابر شاہ و نیشنل ہائی ویز اتھارٹی نا بڑزکو کمامدارآک ہم ساڑی ئسر۔ چیئرمین این ایچ اے شاہد اشرف تارڑ وزیراعظم ئِ ہندا ڈٹ انا بارواٹی خصوصی بریفنگ تس ہراٹی پاننگاکہ لواری ٹنل نوشہرہ مردان مالاکنڈ۔چکدرہ چترال نیشنل ہائی وے این 45آ واقع ئِ ہرانا مرغنی 8.5کلومیٹر ئِ و دا مچ آ سال چترال ئِ ملک انا ایلو بشخ آتون ملفک، لواری ٹنل ڈٹ انا پی سی ون نا رداٹ ڈٹ آ 27 ارب روپئی خڑچ م و داڈٹ اٹی 8.5کلومیٹر و 1.9 کلومیٹر نا اِرا سرنگ آتیان بیدس 35کلومیٹر رابطہ روڈ و 12پول ہم اوار ئُ۔ بریفنگ اٹی وزیراعظم ئِ پاننگاکہ لواری ٹنل ڈٹ داجاگہ نا الس نا متکن آ خواست ئس ہرادے پاکستان مسلم لیگ (ن) نا حکومت پایہ تکمیل اسکان سرکننگ کن ارب آ روپئی نا فنڈ جاری کرے و دا ڈٹ وزیراعظم نواز شریف نا کنڈآن خیبر پختونخواہ خاص کر چترال و مالاکنڈ ڈویژن کن ٹیکی اسے ہرانا سوب چترالی الس نا ملک انا ایلو بشخ آتون ڈغاری رابطہ مچ آ سال بحال مریک۔ بریفنگ نا رداٹ ڈٹ آن علاقہ ٹی اقتصادی و واپاری سرجزآتا مون آ دننگ، ہندی بندغ آتے کن روزگارنا وارخواہی ، سیل و سوات نا مون آ دننگ و مسافر آتے وخت انا زیان آن بچنگ اٹی کمک رسینگک۔ لواری ٹنل نا بناءنا وخت آ اپردیر و چترال نا الس نا اسہ بھلو کچ اس قومی و مسلم لیگ(ن) نا بیرک ئِ توریسرو ”قدم بڑھاﺅ نواز شریف ہم تمہارے ساتھ ہیں“ و“ نواز شریف زندہ باد نا نعرہ ئِ خلکرہ“۔ داڑے داہیت ذکر انا قابل ئِ کہ دا ڈٹ انا پی سی ون نا خڑچ کم و ود 27 ارب روپئی ئِ۔ وزیراعظم محمد نواز شریف چارسال مست اقتدار ئِ سنبھالنگ آ داڈٹ انا کنڈآ چکار تخاو دامشکل ڈٹ آ عملدرآمد نا بناءکننگا۔ ٹنل نا جوڑ جاڑ آن مست سال آن کم و ود 5 تو و خاص وڑاٹ بھاز یخ انا موسم اٹی چترا ل نا علاقہ مچ آ ملک آن کٹائنگاکہ و ہندی خلقت ئِ ویل آتون مون تروئی مسکہ۔ بلاشبہ دا حالیت آک بے کچ ڈکھیا و دمدستی توجوہ طلب ئسر۔ داہیت انا کریڈٹ ہم ساڑی آ حکومت ئِ کاہک کہ لواری ٹنل کون آ عظیم و مشکل ڈٹ ئِ اولیتی بنداو تیا پورو کننگا۔ لواری ٹنل نا پوروی آ ملک انا دا مر مر انگا علاقہ غاک ہم قومی شونداری نا دنگ اٹی اوار مسنو، داسہ دا علاقہ ٹی چنکا صنعت و اُرائی دست کاری تے غیرمعمولی فروغ اس مریک و خلقت نا کٹیا نا ذریعہ ودک۔ داعلاقہ ٹی معدنیات نابہتات ئِ و اوفتا دریافت معاشی نقطہ نظرآن خصوصی اہمیت تخک۔ ڈٹ انا پوروی آن گاڈی تے ساڑی آ خطرناک موڑ و دشوار گزار کسر تیان نجات ملک و داعلاقہ مچ آ سال ہن و بر کن ملوک مریک۔ داکان بیدس دا علاقہ ٹی سیل و سوات نا مون آ دننگ نا بھاز گمان ارے و مچ آسال رسینگ نا سوب داڑے سیل و سوات نا صنعت شون ہلیک۔ داجاگہ نا دلفریب قدرتی نظارہ غاک المی وڑاٹ ملکی و درملکی سیل و سواتی تے کن ہم است خواہی نا سوب مریرہ۔ سیل و سوات نا مون آ دننگ ہندی آبادی نا معاشیات آ خوشگوار ئُ زئم اس تمک۔ وزیراعظم محمد نواز شریف نا راہشونی ٹی مچ آ ملک اٹی موٹرویز و ہائی ویز آتا جوڑ جاڑ و ودیکی و اپ گریڈیشن نا ہرا چرجوئی 2013ءٹی بناءکننگا او بے کچ سرسہبی اٹ جاری ئِ۔ داوخت تقریباََ 1200 ارب روپئی آن زیات انا شاہراتی ڈٹ پوروی ٹی ئُ ہراڑآن نئے بیرہ پاکستان بلکن مچ آ ڈیہہ نا معاشی آخبت وابستہ ئِ ۔ سی پیک ڈٹ انا رداٹ خنجراب آن گوادر اسکان موٹرویز و ہائی ویز آتا اسہ گیشتر ئُ نیٹ ورک اس جوڑ جاڑ کننگ انگ ئِ ہرانا سوب پاکستان ہمسایہ ملک آتون نیامی ایشیائی ریاست آتون علاقائی واپاری سرجز آتیٹی بنجائی ئُ حیثیت اس اختیار کیک۔
