اسلام آباد۔ 22 جنوری (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ چین پاکستان اقتصادی راہداری نا ارٹ میکو ریسہ ٹی حکومتی کہول انا جاگہ غا بزنس ٹوبزنس آ زیات چکار کننگک، سی پیک فیز ٹوٹی چینی کمپنی تے پیدواری یونٹ آتے پاکستان آ گدریفنگ آ قائل کننگک۔ داخیال آتا درشانی ءِ او ڈیووس اٹی ورلڈ اکنامک فورم اٹی پدتموک زرگزران تیا جہانی وام تا ودوک آ بھاریم نا سرحال آ بڑزکو کہولی مذاکرہ غان بطور پینلسٹ تران کرساکرے۔ وزیرخزانہ مالیاتی پالیسی تیٹی بدلی و وام تیٹی پائیداری نا کمک اٹ سوگو و لچکدار زرگزران نا قیام آ نقطہ نظر ءِ بیان کرے۔ اوپارے کہ پاکستان نا غٹ آن بھلا ویل کرنٹ اکاؤنٹ و فسیکل اکاؤنٹ نا جاڑانگا نسخان رہینگانے۔ فسکل نسخان نا غٹ آن بھلا سوب 9آن 10 درسد غیرپائیدار خراج ٹو جی ڈی پی کچءِ۔ پنجرجاتی اصلاحات نا سوب خراج ٹو جی ڈی پی کچ ءِ 13 درسد اسکان دننگ نا کوشست برجاءِ۔ وزیرخزانہ اورنگزیب پارے کہ خراج ٹوجی ڈی پی کچ ءِ ودفنگ آن بیدس قوم تا برادری ٹی باعزت ہند اسے نا دوئی کننگ ممکن ءِ۔ حکومت تینا خڑچ آتیٹی کمتی و وام تا تننگ نا کچ ءِ کم کننگ کن کوشست کننگ ءِ۔ تینا اُراءِ سہی کننگ آن بیدس وام تا بھاریم آن خلاصی مننگ مشکل ءِ۔ اوپارے کہ پاکستان اٹی وام ٹو جی ڈی پی کچ 78 درسد آن کم مرسا 67 درسد آ بسنے۔ وام ہلنگ خراب اف وام تا سہی کاریم اٹ اتنگ المی ءِ۔ وام تیان خڑچ غاتے چلیفنگ یا سبسڈیز تننگ نا جاگہ غا پیدواری لائخی ءِ ودفسا برآمد آتے بایدے مون آ دننگے۔ پاکستان نا زرگزرانی شونداری شیف بڑزی نا شکار مسنے۔ وزیرخزانہ پارے کہ جی ڈی پی ناشرح نمو 4 درسد مننگ تون زرگزران نا درآمد آتیا سیبو نا سوب ادائیگی تا توازن بگڑینگک۔ ادائیگی تا توازن نا بگڑینگ انگ آن ہروار آئی ایم ایف آ ہنوئی تمک۔ پائیدار شونداری نا دوئی کننگ پاکستان نا اولیت ءِ۔ زرگزران نا ڈی این اے ءِ بدل کرسا برآمد آتا کمک اٹ زرگزران ءِ سوگو کننگ نا پالیسی آ ہِننگ اُن۔ نجی بشخ ءِ زرگزرانی شونداری ٹی ہراول دستہ نا کڑد ءِ ادا کروئی مریک۔
