اسلام آباد۔24دسمبر (اے پی پی):قائداعظم محمد علی جناح ءِ 148می سالروچ ءِ درگت ءَ ڈائریکٹوریٹ آف الیکٹرانک میڈیا اینڈ پبلیکیشنز ءِ نیمگ ءَ ڈیجیٹل فوٹو ءُ پینٹنگ ءِ نمائش ءِ برجم دارگ بوت۔ سئے شمبے ءِ روچ ءَ انفارمیشن سروس اکیڈمی ءَ برجم داشتگیں مراگش ءِ تہ ءَ پاکستان ءِ بُن ھشت ایر کنوکیں پت ءِ نادرائیں اکس ءُ پینٹنگ آنی پیشدارگ کنگ بوت ایشی ءِ تہ ءَ نوکیں نسل ءَ را یک جتاھیں وطن ءِ واستہ راج ءِ یاتگاریں کوشست ءُ قربانی آنی بابت ءَ سرپدی دیگ بوت۔ نمائش ءِ ساھت ءَ قائداعظم محمد علی جناح ءِ زند ءُ کامیابی آنی عکس ءَ پیش داشتگیں دستاویزی فلم ھم پیشدارگ بوت۔ مراگش ءِ ڈائریکٹر جنرل انفارمیشن سروس اکیڈمی سید مبشیر توکر شاہ مراگش ءِ مستریں مہمان بوتگ وھدیکہ الیکٹرانک میڈیا ءُ پبلکیشنز ءِ ڈائریکٹریٹ ءِ ایگزیکٹو ڈائریکٹر جنرل عمرانہ وزیر ، ڈائریکٹر جنرل ثمینہ فرزین ءُ اے دگہ مزنیں کارندہ ھم ساڑی بوتگ انت۔ اے موہ ءِ سر ءَ تران کنان ءَ ڈی جی انفارمیشن سروس اکیڈمی سیّد مبشر توقیر شاہ ءَ قائداعظم محمد علی جناح ءَ را امیت ءُ جزم ءِ مردم لیک اتگ ، آئی ءِ بے دروریں جزم ءِ سبب ءَ پاکستان ءِ جوڑیشت بوتگ۔ آئی ءَ اے ڈیجیٹل فوٹو نمائش ءِ سوبمندیں برجائی ءِ واستہ ڈائریکٹوریٹ آف الیکٹرانک میڈیا اینڈ پبلی کیشنز ءِ گامگیج ءُ اسلام آباد ءِ کالج ءُ یونیورسٹی آنی نودربر آناں مراگش ءَ ہوار کنگ ءِ کوشست آناں ساڑات۔ سید مبشر توقیر شاہ ءَ گوشت کہ ما وتی ھمروچی زند ءَ قائداعظم ءِ آدرش آنی پد ءُ رند ءَ بہ کن ایں۔ مراگش ءِ ساھت ءَ قائداعظم ءِ سالروچ ءِ روچ ءَ نقاشی ءُ اکس ءِ نمائش ءِ مقابلہ ءِ سوبمندیں مردم آناں ستا ءِ سرٹیفکیٹ ھم بھر ءُ بانگ کنگ بوت۔ آئی ءَ نمائش ءَ بھر زوروکیں نودربر آنی ازمی ءُ فکری کوشست ساڑاتگ ءُ نمائش ءِ تر ءُ تاب کتگ۔ نمائش ءِ تہا آرٹ دوستیں کالج ءُ یونیورسٹی ءِ نودربراں مزنیں کساسے ءَ بہر زرتگ۔ مراگش ءِ گڈسرا قائداعظم ءِ بوتن روچ ءِ درگت ءَ کیک کپ کت۔
