شانگلہ۔ 23 دسمبر (اے پی پی): کشمیر ءِ کار ءُ گلگت بلتستان ءِ بنجاھی وزیر ءُ خیبر پختونخوا ءِ صدر انجینئر امیر مقام ءَ شنگلا ءِ دمگ پگورائی باغ سر ءَ شہید ہیڈ کانسٹیبل نثار علی خان ءِ گس ءِ تر ءُ تاب کتگ۔ قبر ءُ پُل ایر کت۔ فدرال وزیر ءَ شہید ءِ حیثیت ءِ برز کنگ ءُ ٹپیگ آنی زوت جان سلامتی ءِ دعا کتگ۔ بنجاھی وزیر ءَ شہید ءِ کھول ءِ گوما دلپدردی ءِ درشانی کتگ ءُ مسلم لیگ ءِ راہشون میان نواز شریف ءُ مزن وزیر شہباز شریف ءِ نیمگ ءَ ہمدردی ءِ کلوہ سر کتگ۔ آئی ءَ وتی نیمگ ءَ نقد مالی کمک ءِ پیشکش کتگ ءُ دل یکیمی داتگ کہ شھید ءِ کھول ءِ ھمک رنگ ءَ کمک کنگ بیت۔ انجینئر امیر مقام ءَ مرکزی حکومت ءِ نیمگ ءَ شہیدانی پیکج دیگ ءِ عہد ہم کتگ ءُ گشتگ کہ شہیدانی قربانی بے سوب نہ بنت۔ آئی ءَ گوشت کہ اے بامردیں زھگاں مئے ڈیھ ءِ رکھینگ ءِ واستہ وتی سرانی ندر کنگ ءَ مارا شان داتگ۔ آئی ءَ گوشت کہ ناشرکاری ءِ ھلاسی ءِ واستہ راج یکمشت اِنت ءُ حکومت ءُ سیکورٹی فورسز ءِ کش ءُ گور ءَ اوشتاتگ، مسلم لیگ (ن) ءِ سروکی ءَ مدام الس ءِ انجحام آنی تہ ءَ بھر زرتگ ءُ شھید آنی قربانی کدی شموشگ نہ بنت۔ زانگ بہ بیت اے وئیل گوستگیں روچاں گنگر ءِ چیک پوسٹ ءِ سر ءَ ناشرکاری اُرش ءِ وھد ءَ بوتگ کہ ایشی ءِ تہ ءَ ہیڈ کانسٹیبل نثار علی خان ءُ اے ایس آئی حسن خان ءَ وتی جان ندر کتگ اَنت۔
