اسلام آباد۔ 27نومبر (اے پی پی) بنجائی دارالحکومت اسلام آباد اٹی غٹ داخلی و خارجی کسر تیان اڑاند آتے مر کننگا۔ ڈپٹی کمشنر اسلام آباد عرفان نواز میمن نا پارت آ بنجائی دارالحکومت اٹی اڑاند آتے مر کننگ نا چرجوئی ءِ برجاتخسا غٹ داخلی و خارجی کسر تیان اڑاند آتے مر کننگا۔ چارشنبے نادے آ ضلعی انتظامیہ نا کنڈآن جاری بیان نا رداٹ فیض آباد نا ہند آ لگوک غٹ بند ش آتے چٹفنگا، فیض آباد اٹی بند کروک آ غٹ بس ٹرمینل آک ہم ملنگار، 26 نمبر پوائنٹ و سری نگر ہائی وے ءِ پورو وڑاٹ ملنگا۔ 26 نمبر پول و فتح جنگ روڈ آن ہم اڑاند آتے مر کننگا، پشاور روڈ و سنگجانی ٹول پلاز ءِ ہم ملنگا۔ کٹی پہاڑی، مارگلہ ایونیو و جی ٹی روڈ انا بندش ءِ ہم چٹفنگا، ایران ایونیو و ای الیون آن اڑاند آتے مر کننگ نا چرجوئی برجاءِ۔ متکن آمارگلہ روڈ آن ہم کنٹینر آتے اینک کننگ نا عمل پورو مس۔ انٹرچینج نا ہند آخلوک آ کینٹرآتے ہم مر کننگا۔ ڈپٹی کمشنر اسلام آباد پارے کہ مچ آ شار انا چندی کسر تیان کنٹینر آتے اسہ کنڈ کننگ نا عمل پورو مس۔ شاری اسلام آباد نا شاہراہ تیا آسانی اٹ ہن وبر کننگ کیرہ۔ عرفان میمن پارے کہ مچ آ شاراٹی سفائی نا عمل ءِ ہم پورو کننگانے۔
