راولپنڈی۔ 27 نومبر (اے پی پی) چین نا سینٹرل ملٹری کمیشن (سی ایم سی) نا نائب چیئرمین جنرل ژانگ یوشیاء بڑزکو کہولی ڈل اتون اوار جنرل ہیڈکوارٹرز (جی ایچ کیو) نا دورہ ءِ کرے۔ شرفمند آ مہمان آرمی چیف جنرل سید عاصم منیر تون ون آن ون اوڑدہی کرے اوکان پد ڈل آتا کہول آ گپ وتران مس۔ آئی ایس پی آر نا رداٹ دا اوڑدہی تیٹی تین پہ تینی است خواہی نا امور، علاقائی سیکورٹی نا حالیت، ڈیہہ اٹی سوگوی نا گام گیج و ہڑتوم آ کنڈآتا دفاعی کمکاری ءِ مون آ دننگ آ گپ وتران کننگا۔ آرمی چیف جنرل عاصم منیر پاکستان وچین نا پائیدار دوستانہ تعلقداری تے تالان کرسا پارے کہ داتعلقداری تین پہ تینی و پت انا بنداو آ جوڑ ءُ۔ اوداتاریخی شریداری ءِ وخت انا ہرامتحان اٹی ثابت قدم گوندا و داٹی پین گچینی نا اومیت ظاہرکرے۔ آرمی چیف چین نا سرکڑدہ نا منت واری ءِ ہرفے ہرا جہانی و علاقائی حالیت آتا بدلی آن پد ہم پاکستان تون سوگوی اٹ سلوکءِ۔ جنرل ژانگ یوشیاء پاکستان تون تینا اسٹریٹجک شریداری کن پاکستان نا آخبتی تعلقداری نا بھاز ستاءِ کرے۔ اودہشت گردی نا برخلاف پاکستان آرمی نا کسبی مہارت و عزم انا ستاءِ کرے و دا متکن آ تعلق ءِ پین سوگو کننگ نا عزم انا درشانی ءِ کرے۔ داکان مست جی ایچ کیو آ سرمننگ آ جنرل ژانگ یوشیاء یات گار شہید آتیا پھل آتا چادر اس شاغا و پاکستان نا شہیدآتے خراج عقیدت پیش کرے۔ اودے پاکستان آرمی نا اسہ چاق و چوبند دستہ نا کنڈآن گارڈآف آنر ہم پیش کننگا۔
