اسلام آباد۔ 26 نومبر (اے پی پی) پاکستان وبیلاروس ہڑتوم آکنڈآتا تعلقداری نا ساڑی مثبت رفتار آ است جمی نا درشانی ءِ کرسا دا رابطہ غاتے پین سوگو کننگ ، بین الپارلیمانی ہن وبر تے سوگو کننگ، تین پہ تینی واپاری و اقتصادی کمکاری ءِ ودفنگ کن اسیجائی عزم انا درشان و ادارہ جاتی کمکاری نا کمک اٹ دا رفتار ءِ برقرارتخنگ نا امنا کرینو۔ بیلاروس نا صدر الیگزینڈر لوکاشینکو نا دورہ پاکستان اٹی پاکستان و بیلاروس نا نیام اٹ سے شنبے نادے آ ڈل آتا کہول آ گپ وتران مس و کیہی اہم معاہدہ و مفاہمت نا یات داشت (ایم او یو) تیا دستخط مس۔ وزیراعظم آفس نا میڈیا ونگ انا کنڈآن جاری بیان نا رداٹ جمہوریہ بیلاروس نا صدر الیگزینڈر لوکاشینکو و وزیراعظم محمد شہباز شریف تیناتینا ڈل آتا کماشی ءِ کریر۔ ہڑتوم آملک آتا نیام اٹ ڈل آتا کہول آ گپ وتران نا دا ریسہ پاکستان و بیلاروس نا نیام اٹ گچین ہڑتوم آ کنڈآتا تعلقداری نا ڈیک ءِ۔ فریق آک ہڑتوم آ کنڈآتا تعلقداری نا پورو سپیکٹرم تون اوار اوار اہم علاقائی و جہانی پیش رفت آ گپ وتران کریر و ہڑتوم آ ملک آتا تعلقداری تے پین سوگو ، بین الپارلیمانی ہن و برتے سوگو کننگ خاص کر ہڑتوم آ کنڈآتا واپاری و اقتصادی کمکاری ءِ ودفنگ کن ہڑتوم آ ملک آتا اسیجائی عزم انا درشانی ءِ کریر۔ وزیراعظم شہباز شریف و صدر لوکاشینکو پاکستان بیلاروس تعلقداری ناساڑی مثبت رفتار آ است جمی نا درشانی ءِکریر۔ ہڑتوم آ راہشونک باقاعدہ بڑزکو کہول آ اوڑدہی و ادارہ جاتی کمکاری نا کمک اٹ دارفتار ءِ برقرارتخنگ آامنا کریر۔ ہڑتوم آ راہشونک کیہی اہم معاہدہ و مفاہمت نا یات داشت (ایم او یو) تیا دستخط آتا ہم مشاہدہ ءِ کریر ہرانا مسخت پاکستان و بیلاروس نا نیام اٹ اہم بشخ آتیٹی خڑکی کمکاری ءِ مون آدننگ ءِ۔ دامعاہدہ و ایم اویوز چاگڑدی رکھ، ڈیزاسٹر مینجمنٹ ، حلال واپار، آڈٹ ادارہ، مالیاتی انٹیلی جنس شیئرنگ، ووکیشنل ایجوکیشن و سائنس اینڈ ٹیکنالوجی ٹی کمکاری تون تعلقدار ءُ۔ اوڑدہی ٹی ’’پاکستان و بیلاروس نا نیام اٹ 2025-2027کن جوان کمکاری نا روڈ میپ ‘‘ آ امنا مس ہرانا رداٹ بڑزکو کہولی دیوان ، بین الحکومتی کمیشن و ہدف آتا کمک اٹ اقتصادی تعلقداری تے ودفنگ کن اسہ اسٹریٹجک فریم ورک اسے نا خاکہ ءِ پیش کننگانے۔ دافریم ورک انا کمک اٹ تین پہ تینی کمکاری نا گام گیج، علاقائی اقتصادی رابطہ غاتا اہمیت آ زور شاغنگانے۔ فریق آک ہڑتوم آ کنڈآتا اقتصادی کمکاری ٹی ترندی اتنگ کن درکار کانودی فریم ورک ءِ گچین کننگ آ ہم امنا کریر۔ بیلاروس نا صدر وزیراعظم پاکستان نا تعلقداری تے پوسکن آ جہت آ دننگ نا عزم انا ستاءِ کرے و دا چرجوئی ٹی تینا و تینا حکومت نا پبی کمکاری نا باوری کرفے۔ اووزیراعظم پاکستان شہباز شریف ءِ بیلاروس نا دورہ نا سلہ ءِ ہم خلک ہراڑآن ہڑتوم آ ملک آتا تعلقداری ٹی پین وسعت بریک۔ وزیراعظم اونا سلہ ءِ امنا کرسا پارےکہ اونا دا دورہ ٹی مفاہمتی یات داشت آتے معاہدہ غاتا دروشم اس تننگک۔ بیان نا رداٹ وزیراعظم تعلقدار وزیر آتے پارت جاری کرے کہ او دا چرجوئی ٹی زوت آن زوت المی گام گیج کیر۔
